Presidenti amerikan Donald Trump ka pritur në Shtëpinë e Bardhë homologun e tij kinez, Xi Jinping, në një ceremoni të shoqëruar me nderime shtetërore, përpara zhvillimit të takimit dypalësh mes dy liderëve.
Pas ceremonisë, Trump dhe Xi u zhvendosën në Zyrën Ovale, ku zhvilluan bisedime së bashku me zyrtarë të lartë amerikanë dhe kinezë. Në fokus të takimit pritet të jenë marrëdhëniet tregtare mes dy ekonomive, inteligjenca artificiale dhe çështja e Tajvanit.
Gjatë deklaratave të tij, Trump u shpreh pozitivisht për marrëdhëniet mes Uashingtonit dhe Pekinit, duke deklaruar se është krenar për raportin me Kinën dhe se të dyja palët do të vijojnë të punojnë së bashku.
Nga ana tjetër, Xi Jinping theksoi se SHBA-ja dhe Kina janë dy vende të ndryshme, por me interesa “thellësisht të ndërthurura”. Presidenti kinez tha se dy vendet mund të ndërtojnë besim të ndërsjellë dhe të forcojnë bashkëpunimin në fusha me interes të përbashkët.
Një prej njoftimeve që tërhoqi vëmendjen ishte propozimi i Xi Jinping për të ftuar 100 mijë të rinj amerikanë në Kinë gjatë pesë viteve të ardhshme, në kuadër të programeve të shkëmbimit dhe studimit. Detajet e nismës nuk janë bërë ende të ditura, por ajo synon të rrisë kontaktet dhe shkëmbimet mes të rinjve të dy vendeve.
Xi njoftoi gjithashtu se dy panda do të mbërrijnë së shpejti në një kopsht zoologjik në Atlanta, duke i cilësuar kafshët si një simbol të historisë së marrëdhënieve dhe miqësisë mes Kinës dhe Shteteve të Bashkuara.
Takimi Trump-Xi zhvillohet në një periudhë të rëndësishme për marrëdhëniet ekonomike mes dy vendeve, pasi Uashingtoni dhe Pekini kanë rënë dakord të zgjasin armëpushimin në konfliktin tregtar deri më 10 janar.
Pas bisedimeve në Shtëpinë e Bardhë, dy presidentët pritet të marrin pjesë në një darkë shtetërore, ku do të jenë të pranishëm zyrtarë të lartë të të dy vendeve, si dhe drejtues të kompanive të rëndësishme të sektorit të teknologjisë.