Ministria për Evropën dhe Punët e Jashtme, ka kujtuar sulmin terrorist në Banjskë, në veri të Kosovës, duke theksuar se edhe sot domosdoshmëria mbetet e njëjtë: llogaridhënie e plotë.
Dikasteri i drejtuar nga ministri Ferit Hoxha, thotë se të gjithë ata që ishin përgjegjës për planifikimin, organizimin, financimin dhe kryerjen e sulmit duhet të dalin para drejtësisë, ndërsa të gjitha rrethanat që lidhen me këtë akt dhune duhet të zbardhen.
"Sulmi në Banjskë nuk ishte vetëm një sulm ndaj forcave policore të Kosovës. Ai ishte një sulm ndaj sundimit të ligjit, ndaj paqes dhe sigurisë, si dhe ndaj përpjekjeve për të ndërtuar stabilitet të qëndrueshëm dhe normalizim në rajon", thuhet në deklaratë.
Ministria për Europën dhe Punët e Jashtme, Tiranë 24 Shtator 2026
Tre vjet më parë, më 24 shtator 2023, Kosova u përball me një nga incidentet më të rënda të sigurisë që nga shpallja e pavarësisë. Një grup paramilitar serb, i armatosur rëndë, sulmoi Policinë e Kosovës në Banjskë, duke vrarë rreshterin e policisë Afrim Bunjaku dhe duke plagosur zyrtarë të tjerë në krye të detyrës.
Tre vjet më pas, domosdoshmëria mbetet e njëjtë: llogaridhënie e plotë. Të gjithë ata që ishin përgjegjës për planifikimin, organizimin, financimin dhe kryerjen e sulmit duhet të dalin para drejtësisë, ndërsa të gjitha rrethanat që lidhen me këtë akt dhune duhet të zbardhen plotësisht.
Sulmi në Banjskë nuk ishte vetëm një sulm ndaj forcave policore të Kosovës. Ai ishte një sulm ndaj sundimit të ligjit, ndaj paqes dhe sigurisë, si dhe ndaj përpjekjeve për të ndërtuar stabilitet të qëndrueshëm dhe normalizim në rajon. Lejimi që akte të tilla të mbeten pa përgjigje do t’u dërgonte mesazhin e gabuar atyre që synojnë ta minojnë paqen përmes dhunës dhe frikësimit.
Nuk mund të ketë paqe të qëndrueshme, stabilitet të qëndrueshëm apo normalizim dhe pajtim të vërtetë pa llogaridhënie. Drejtësia nuk është dhe nuk duhet të jetë kurrë pengesë për dialogun. Përkundrazi, ajo është një nga themelet thelbësore mbi të cilat duhet të mbështeten dialogu i besueshëm, besimi i ndërsjellë dhe pajtimi afatgjatë.
Sondazh
Lexo gjithashtu
