Dhjetëra përfaqësues braktisin sallën gjatë fjalimit të Netanyahut në OKB
Një skenë e pazakontë u regjistrua në selinë e Kombeve të Bashkuara në Nju Jork, teksa kryeministri izraelit Benjamin Netanyahu nisi fjalimin e tij në Asamblenë e Përgjithshme. Sipas raportimeve, rreth 77 delegacione u larguan nga salla, duke lënë pas një numër të madh vendesh bosh.
Largimi ndodhi në momentin kur Netanyahu mori fjalën. Kryeministri izraelit reagoi drejtpërdrejt ndaj delegatëve që po dilnin nga salla, duke deklaruar: “Për të gjithë frikacakët që duan të largohen, ju lutem, bëjeni tani.”
Fjalimi u zhvillua në një klimë të tensionuar ndërkombëtare, ndërsa lufta në Gaza dhe veprimet ushtarake të Izraelit kanë shkaktuar kritika dhe protesta nga vende të ndryshme. Para fjalimit, përfaqësuesi palestinez në OKB kishte bërë thirrje për bojkotimin e fjalimit të kryeministrit izraelit.
Ndërkohë, jashtë selisë së OKB-së në Nju Jork u zhvilluan protesta kundër Netanyahut, ku pati edhe ndërhyrje të policisë dhe arrestime. Pamjet e delegacioneve që largohen nga salla, ndërsa Netanyahu vijon fjalimin përpara një audience të reduktuar, u shpërndanë me shpejtësi në rrjetet sociale.
