Problemet me sigurinë ushqimore prekin sërish produktet shqiptare të eksportuara në vendet e Bashkimit Evropian. Këtë herë bëhet fjalë për açuge të bllokuara në Itali për shkak të niveleve të larta të histaminës dhe speca të kuq të ndaluar në Kroaci për shkak të pranisë së një insekticidi mbi kufijtë e lejuar.
Në Itali është bllokuar një sasi açugesh të eksportuara nga Shqipëria, pasi analizat kanë evidentuar prani të lartë të histaminës, një substancë që mund të shkaktojë probleme serioze shëndetësore në rast të konsumit në nivele të larta.
Sipas të dhënave të publikuara, produkti ishte eksportuar nga kompania shqiptare “Poseidoni” dhe është zbuluar gjatë kontrolleve të kryera nga autoritetet italiane të sigurisë ushqimore në një supermarket. Analizat kanë treguar një përqendrim prej 800 mg/kg histaminë, ndërsa kufiri maksimal i lejuar është 400 mg/kg.
Pas konstatimit të problemit dhe publikimit të rezultateve të analizave, produkti është tërhequr nga tregu italian.
Ndërkohë, edhe autoritetet kroate kanë bllokuar një tjetër ngarkesë me produkte bujqësore shqiptare. Bëhet fjalë për 3427 kilogramë speca të kuq, të cilët kanë rezultuar me prani të lartë të insekticidit Flonicamid.
Sipas të dhënave të raportuara, prodhimi është kultivuar në fshatin Mollas të Elbasanit. Flonicamidi përdoret në bujqësi për luftimin e disa dëmtuesve të bimëve, përfshirë mizën e bardhë dhe morrat e bimëve.
Analizat laboratorike kanë evidentuar një prani prej 0.8 mg/kg të kësaj substance në specat e kuq, ndërsa për këtë produkt prania e saj duhet të jetë zero, sipas të dhënave të referuara në njoftimin e sistemit të kontrollit.
Edhe pse Flonicamidi është një preparat i lejuar për mbrojtjen e bimëve, prania e mbetjeve të tij në produkt mund të lidhet me mosrespektimin e periudhës së karencës, pra kohës që duhet të kalojë nga përdorimi i pesticidit deri në vjeljen e produktit.
Kjo është ngarkesa e katërt me speca të bllokuar nga Kroacia gjatë këtij muaji, sipas të dhënave të raportuara.
Rastet e përsëritura të bllokimit të produkteve shqiptare për shkak të problemeve të sigurisë ushqimore ngrenë pikëpyetje për respektimin e standardeve gjatë prodhimit dhe kontrollin e produkteve para eksportit.
Ndërkohë, problematikat e tilla mund të kenë pasoja edhe për fermerët e tjerë shqiptarë, pasi rastet e evidentuara në tregjet europiane ndikojnë në perceptimin dhe kërkesën për produktet shqiptare, duke krijuar presion edhe mbi çmimet e prodhimeve bujqësore.