Një 28-vjeçar me origjinë shqiptare është vënë nën hetim në ishullin e Rodosit, në Greqi, pas kallëzimit të një 44-vjeçareje me origjinë polake, e cila e akuzon për mashtrim financiar dhe kërcënim me publikimin e fotove intime. Sipas mediave greke, gruaja pretendon se i riu e ka bindur përmes informacioneve të rreme që t’i transferonte para në disa këste, gjatë periudhës tetor 2024–nëntor 2025. Në total, ajo dyshohet se i ka dhënë 28-vjeçarit 15,417 euro.
44-vjeçarja ka deklaruar se më vonë kuptoi se informacionet mbi të cilat ishte bazuar për t’i dhënë paratë nuk përputheshin me realitetin dhe i kërkoi të riut t’ia kthente shumën. Sipas kallëzimit, në këtë moment situata është përshkallëzuar, pasi 28-vjeçari dyshohet se e ka kërcënuar se do t’u dërgonte familjarëve të saj fotografi nudo që pretendonte se i kishte në posedim. E frikësuar, gruaja iu drejtua policisë së Rodosit.
Pas denoncimit, Nëndrejtoria e Hetimit dhe Ndjekjes Penale të Krimit në Rodos ka nisur hetimet ndaj 28-vjeçarit për mashtrim, kërcënim dhe pornografi për hakmarrje. Autoritetet po hetojnë mënyrën se si janë marrë paratë dhe pretendimet për materialet intime. Deri në përfundimin e hetimit dhe një vendim gjykate, akuzat ndaj të riut mbeten pretendime të ngritura nga 44-vjeçarja.
