LaLiga, Premier League, Bundesliga dhe Serie A kanë dalë së bashku kundër mënyrës se si qeveriset FIFA, duke kërkuar një reformë të thellë të strukturës drejtuese të institucionit që administron futbollin botëror.

Në një deklaratë të përbashkët, katër ligat kërkojnë më shumë transparencë, pjesëmarrje reale të palëve të interesuara dhe vendimmarrje të bazuar në të dhëna objektive. Një tjetër kërkesë kryesore është ndarja e qartë mes funksioneve rregullatore dhe atyre komerciale të FIFA-s, si dhe mbrojtja e çështjeve disiplinore nga çdo ndërhyrje politike.

Ligat shprehen veçanërisht kritike ndaj përqendrimit të pushtetit në duart e presidentit të FIFA-s, Gianni Infantino. Sipas tyre, problemi nuk lidhet vetëm me një person, por me një sistem ku drejtuesi i FIFA-s mund të ketë njëkohësisht ndikim rregullator, politik dhe komercial, pa mekanizma të mjaftueshëm kontrolli.

Në deklaratë përmendet edhe projekti FIFA Forward Enterprise, i cili u tërhoq pas kundërshtimeve, ndërsa theksohet se problemet që çuan në krijimin e tij ende nuk janë zgjidhur. Katër ligat deklarojnë se “futbolli ka pësuar një nga abuzimet më të mëdha të pushtetit në historinë e FIFA-s”.

Një tjetër pikë e fortë e kritikave lidhet me kalendarin ndërkombëtar. Ligat argumentojnë se zgjerimi i vazhdueshëm i kompeticioneve dhe ndërprerjet më të gjata të kampionateve kombëtare ndikojnë drejtpërdrejt te klubet, lojtarët dhe tifozët, ndërsa palët e prekura nuk kanë rol të mjaftueshëm në vendimmarrje.

Për zgjedhjet e ardhshme presidenciale të FIFA-s, ligat kërkojnë që kandidatët të angazhohen për një strukturë më transparente dhe demokratike. Ato propozojnë krijimin e një organi të përhershëm ku të përfaqësohen federatat, ligat, klubet dhe lojtarët, si dhe vlerësime të pavarura për ndikimin e vendimeve të mëdha.

Në fund, kërkohet që vetë FIFA të ruajë neutralitet të plotë gjatë procesit zgjedhor dhe që burimet financiare e institucionale të mos përdoren për të favorizuar asnjë kandidat.