Papa Leone XIV ka mbërritur në Francë për vizitën e tij të parë shtetërore në këtë vend, 18 vjet pas qëndrimit të fundit të një pape. Në Paris, ai u prit nga presidenti francez Emmanuel Macron dhe bashkëshortja e tij, Brigitte Macron, në Pallatin Élysée.
Të lidhura
None found
Mbërritja e Papës u shoqërua nga prania e një numri të madh qytetarësh në rrugët e kryeqytetit, ndërsa ceremonia zyrtare në rezidencën presidenciale u zhvillua nën atmosferën e protokollit dhe tapetit të kuq.
Gjatë qëndrimit disa ditor, Papa Leone XIV do të marrë pjesë në takime dhe aktivitete të ndryshme, ku ndër temat kryesore pritet të jenë e ardhmja e Europës, inteligjenca artificiale dhe roli i Kishës Katolike.
Një nga pikat më të rëndësishme të programit do të jetë fjalimi në UNESCO. Në këtë rast, Papa pritet të trajtojë zhvillimin e inteligjencës artificiale dhe ndikimin që ajo ka në shoqëri.
Leone XIV do të vizitojë edhe Metz-in, ku diskutimi pritet të përqendrohet te perspektiva e Europës dhe ideja e një kontinenti të bashkuar. Në itinerarin e tij janë përfshirë gjithashtu Katedralja Notre-Dame në Paris dhe faltorja katolike e Lourdes.
Qëndrimi i Papës zhvillohet në një kohë kur Kisha Katolike në Francë vijon të përballet me pasojat e skandaleve të abuzimit. Kjo çështje pritet të pasqyrohet edhe në mesazhet që ai do të përcjellë gjatë vizitës.
