Këshilli Bashkiak i Korçës voton pro bashkimit me Maliqin

Këshilltarët bashkiakë të Korçës kanë diskutuar propozimin për ndarjen administrative-territoriale të njësive të qeverisjes vendore. Sipas këtij propozimi, Bashkisë së Korçës do t’i bashkohet edhe Bashkia e Maliqit.

Përpara mbledhjes së këshillit, janë zhvilluar disa dëgjesa publike me banorët e njësive administrative, ku është marrë edhe mendimi i tyre. Sipas kryetarit të grupit të këshilltarëve të majtë, Petrika Tollkuçi, rreth 75% e banorëve janë shprehur pro reformës.

Gjatë mbledhjes, këshilltarët opozitarë janë shprehur kundër bashkimit të Korçës me Maliqin, duke argumentuar se një ndryshim i tillë duhet të mbështetet në një konsultim më të gjerë me qytetarët dhe në analiza të plota mbi pasojat që do të ketë për të dyja bashkitë.

Nga ana tjetër, këshilltarët e mazhorancës janë shprehur pro bashkimit, duke e konsideruar reformën si një mundësi për administrim më efikas dhe zhvillim të përbashkët të territorit.

Pas diskutimeve, Këshilli Bashkiak i Korçës votoi pro bashkimit të Korçës me Maliqin, me 25 vota pro dhe 5 kundër.