“8.6 milionë për ‘TIMAK Defence’ për automjetet e IKMT-së”/ Denoncon PD: Fatura del para procedurës

Zëdhënësja për Antikorrupsionin në Partinë Demokratike, Genta Vangjeli, ka ngritur pikëpyetje mbi një pagesë prej 8.6 milionë lekësh të kryer nga Thesari në favor të kompanisë “TIMAK Defence”, duke iu referuar kronologjisë së dokumenteve të procedurës.

Sipas Vangjelit, kompania ka lëshuar faturën nr. 83/2026 më 8 korrik 2026, ndërsa urdhri për zhvillimin e procedurës, me nr. 3419/6, është nxjerrë më 22 korrik. Kontrata, sipas saj, është lidhur më 6 gusht 2026, me nr. 3419/8.

Më 18 gusht, vijon denoncimi i saj, Thesari ka kryer një pagesë prej 8.641.296 lekësh ndaj “TIMAK Defence”, e përshkruar si parapagim për blerjen e automjeteve për IKMT. Në dokumentacion është përdorur si referencë edhe VKM nr. 638, datë 5 nëntor 2025.

Vangjeli vë në dukje se, sipas datave të dokumenteve që ajo ka publikuar, fatura është lëshuar 14 ditë para urdhrit për nisjen e procedurës dhe 29 ditë përpara lidhjes së kontratës.

Duke iu referuar kësaj kronologjie, zëdhënësja e PD-së kërkon shpjegime se si është lëshuar fatura përpara se të niste procedura dhe përpara se të lidhej kontrata.

Ajo ngre gjithashtu pyetje mbi mënyrën e përdorimit të VKM-së si bazë për pagesën dhe kërkon transparencë nga Ministria e Brendshme lidhur me procedurën dhe marrëdhënien kontraktuale me kompaninë.

"TIMAK DEFENCE’: Kur fatura vjen para procedurës dhe kontrata vjen më pas. Një tjetër rast që kërkon përgjigje.

Përfituesi është ‘TIMAK Defence’, partneri i KAYO-s. Për pagesën përdoret si referencë edhe VKM nr. 638, datë 05.11.2025.

Kronologjia e dokumenteve është e qartë:

8 korrik 2026-’TIMAK Defence’ lëshon faturën nr. 83/2026.

22 korrik 2026-del urdhri nr. 3419/6 për zhvillimin e procedurës.

6 gusht 2026-lidhet kontrata nr. 3419/8.

18 gusht 2026-Thesari i paguan ‘TIMAK Defence’ 8.641.296 lekë, si parapagim për blerje automjetesh për IKMT.

Pra, fatura është lëshuar 14 ditë përpara urdhrit të procedurës dhe 29 ditë përpara kontratës!

Pyetje?

Si mund të faturohet një kontratë përpara se të urdhërohet procedura dhe përpara se të ekzistojë kontrata?

A po përdoret VKM-ja si mburojë ligjore për t’i çuar fondet publike një kompanie të lidhur me KAYO-n?

Sepse rendi normal është:

procedura→kontrata→fatura→pagesa.

Këtu dokumentet tregojnë:

fatura→procedura→kontrata→pagesa.

Kush e kishte sigurinë se kontrata do të lidhej, kur fatura ishte lëshuar ende pa dalë urdhri për procedurën?

Kjo është ajo që Ministria e Brendshme duhet t’u shpjegojë shqiptarëve.

Faturat nuk mund të paraprijnë procedurat.

Kontratat nuk mund të justifikojnë retroaktivisht faturat.

Paratë publike nuk mund të shpërndahen pa transparencë.

Dokumentet janë aty. Tani presim përgjigjet", denoncon Genta Vangjeli./ CNA