Ditën e djeshme, Gjykata e Posaçme rikonfirmoi masat e sigurisë për Vlora Hysenin, Embro Sulejmanin dhe Fatjon Kalluçin, të arrestuarit në kuadër të aksionit të SPAK për dosjen e Ergys Agasit.
Sot janë zbardhur disa prej diskutimeve në seancën e mbajtur për Sulejmanin dhe Kalluçin. Menaxheri i agroturizmit “Kodra e Kuajve” u shpreh se Ergys Agasin e njihte prej vitesh dhe se nuk mendonte se kishte bërë ndonjë krim duke i çuar ushqim gjatë kohës që ishte në kërkim.
“Agasin e njoh prej vitesh, jemi nga e njëjta zonë. Kërkonte që t’i shërbeja unë, nuk mendoj se kam kryer ndonjë krim”- tha thënë Sulejmani në gjykatë. Ky i fundit dyshohet se ka fshirë pamjet e sigurisë të kamerave të vendosura në një lokal në rezidencat qeveritare ku ishte gjithashtu menaxher.
Nga ana tjetër, shefi i laboratorit shkencor të policisë, Fatjon Kalluçi i cili i çonte Agasit foto nga ekspertiza e SPAK për makinën e tij të sekuestruar, nuk ka dhënë shpjegime në seancë. Versus.al
