Ka qenë një natë e vështirë për Ukrainën, e cila është përballur me sulme të furishme ruse. Mediat ndërkombëtare bëjnë me dije se një dron rus goditi një ndërtesë shumëkatëshe në qendër të Kievit të premten në mëngjes, duke vrarë një fëmijë, ndërsa një person u vra në rajonin jugor të Odesës, thanë zyrtarët ukrainas.
Policia tha se një djalë 14-vjeçar u vra dhe të paktën shtatë persona të tjerë u plagosën në një sulm me dron rus në një ndërtesë banimi 16-katëshe në lagjen qendrore Pechersk të Kievit. Një shpërthim u dëgjua pranë qendrës, tha një gazetar i Reuters.
Rusia ka sulmuar Kievin dhe zonat përreth javët e fundit me breshëri pothuajse të vazhdueshme të dronëve të saj më të shpejtë dhe që fluturojnë lart, të cilët janë më të vështirë për t'u kapur.
Rusia mohon se ka shënjestruar qëllimisht civilët në luftën e shkaktuar nga pushtimi i plotë i Ukrainës në vitin 2022.
Një person u plagos në sulmin e natës në kryeqytet, thanë shërbimet e emergjencës. Sulmet shkaktuan zjarre në ndërtesa jo-rezidenciale në dy lagje të qytetit, thanë ata.
Ministria ruse e mbrojtjes tha të premten se forcat e saj kryen sulme me dronë gjatë natës mbi objektet e industrisë së mbrojtjes ukrainase, qendrat logjistike dhe anijet e përdorura nga forcat e armatosura të Ukrainës.
Ndërkohë edhe Ukraina ka sulmuar në territorin rus. Dy persona mbetën të vdekur në sulmet me dronë gjatë natës ndaj Rusisë dhe goditi një rafineri nafte dhe një tren pasagjerësh, thanë zyrtarët rusë.
Ministria e Mbrojtjes e Rusisë tha se njësitë e mbrojtjes ajrore kishin shkatërruar gjithsej 592 dronë gjatë natës.
Një civil u vra dhe një tjetër u plagos kur një dron ukrainas goditi një kamion në rajonin Belgorod të Rusisë, thanë zyrtarët lokalë. Në rajonin e Permit - ku ndodhet një rafineri e madhe nafte - Guvernatori Dmitry Makhonin tha se një burrë ishte vrarë gjatë një sulmi masiv me dron. (A2 Televizion)
A2 CNN Livestream
MUND TE LEXONI GJITHASHTU
