Një tryezë dialogu me Kryeministrin nuk mund të negociojë vendimet e Gjykatës Kushtetuese. Me këtë parim, Sokol Sadushi iu përgjigj publikisht ftesës së Edi Ramës për të diskutuar me përfaqësuesit e institucioneve të drejtësisë lidhur me formulën e llogaritjes së pagave të magjistratëve.
“Për mosmarrëveshjen rreth ligjit për pagat e magjistratëve, është Gjykata Kushtetuese që do të vendosë përfundimisht. Kushtetuta nuk negociohet. As gjykimi kushtetues nuk mund të zëvendësohet nga një tryezë dialogu. Vendimi që do të merret duhet të respektohet dhe të zbatohet. Për sa kohë ligji dhe pretendimet kushtetuese të ngritura ndaj tij janë në shqyrtim përpara Gjykatës Kushtetuese, themeli juridik i kësaj mosmarrëveshjeje nuk mund të negociohet në një tryezë tjetër”, tha Sadushi, përcjell A2 CNN.
Kjo nuk do të thotë se ftesa për dialog refuzohet, sqaron kreu i Gjykatës së Lartë, por në tryezë duhet të jenë të gjitha problemet e sistemit të drejtësisë, thekson ai.
“Prandaj, dialogu nuk duhet të mbetet vetëm te paga. Është koha t’u japim përgjigje çështjeve që përcaktojnë funksionimin e drejtësisë: sa gjyqtarë dhe prokurorë i duhen Shqipërisë, si do të plotësohen vendet vakante, si do të ulet stoku i çështjeve dhe kohëzgjatja e proceseve? Duhet të përcaktojmë çfarë administrate, teknologjie, infrastrukture dhe sigurie u duhen gjykatave dhe si do të financohen këto nevoja në mënyrë të qëndrueshme. Për këtë duhen një rend pune konkret, përgjegjësi të qarta dhe vendime të zbatueshme”, shtoi ai.
Këto qëndrime Sokol Sadushi i mbajti në Mbledhjen e Përgjithshme të Gjyqtarëve, të thirrur për të zgjedhur tre anëtarë të rinj të Këshillit të Lartë Gjyqësor, nga radhët e togave të zeza.
(A2 Televizion)
A2 CNN Livestream
MUND TE LEXONI GJITHASHTU
