Kapiteni i Shqipërisë, Berat Gjimshiti, foli për gazetarët para përballjes me Bjellorusinë në Ligën e Kombeve, duke komentuar gjendjen e ekipit, rikthimin e Etrit Berishës dhe objektivat e kuqezinjve.
Të lidhura
None found
“Besoj se këto ditë na kanë ndihmuar të kuptojmë më mirë idetë e trajnerit. Atmosfera është shumë pozitive. Etrit Berisha ka shumë eksperiencë dhe është një lojtar kyç. E njoh prej kohësh dhe kemi luajtur së bashku në Itali”, u shpreh Gjimshiti për situatën e skuadrës.
I pyetur për kampionatin në Arabinë Saudite dhe ndryshimin e tij si futbollist, mbrojtësi tha se liga është më e vështirë nga sa perceptohet jashtë vendit.
“Ndoshta unë ia kam hapur rrugën Asllanit”, tha ai me humor. “Nga jashtë nuk duket si një kampionat shumë i fortë, pasi ndeshjet nuk transmetohen të gjitha në televizion. Por më besoni, është një ligë e vështirë. Nuk është aq e thjeshtë sa duket dhe për mbrojtësit përbën një sfidë më vete.”
Gjimshiti premtoi angazhim maksimal në sfidën e radhës, ndërsa theksoi se objektivi është përfundimi në vendin e parë dhe një tjetër kualifikim në Europian.
“Tifozëve u premtoj se do të japim gjithçka. Duam vendin e parë në grup dhe mundësinë për të shkuar për herë të tretë në Kampionatin Europian. Kjo është rruga që duhet të ndjekim”, deklaroi kapiteni.
Sa i përket mundësisë që Kombëtarja të luajë me tre mbrojtës, siç ndodhte te Atalanta e drejtuar nga Gasperini, Gjimshiti sqaroi se vendimi i takon trajnerit.
“Gjatë rrugëtimit tim me Kombëtaren kam pasur disa trajnerë. Me Maran kam biseduar për skemën taktike dhe çështje të tjera. Do të zgjedhim atë që është më e mira për ekipin dhe që na çon drejt suksesit. Nuk ka shumë ndryshim nëse luajmë me tre apo katër mbrojtës; këtë e përcakton trajneri”, u shpreh ai.
Kapiteni pranoi se Shqipëria ka presion për të fituar në këtë grup, por nënvizoi se ai dhe shokët e skuadrës janë të motivuar për të dhënë më të mirën.
“Sigurisht që kemi presion në këtë grup. Gjithmonë kam qenë një lojtar që synon maksimumin dhe këtë mendësi e kanë edhe të tjerët. Nuk patëm fat ndaj Polonisë, ndërsa arritja e objektivit do të ishte diçka e madhe. Megjithatë, do të përpiqemi të përmirësohemi në këtë Europian”, tha Gjimshiti.
Duke folur për repartin defensiv, ai vuri në pah rëndësinë e mentalitetit dhe të besimit në vetvete.
“Fryma dhe mentaliteti janë më të rëndësishmet. Gjithçka nis në kokë. Kjo është pika kryesore. Trajneri ka idetë e tij dhe disa lojtarë, falë mënyrës së punës së Maran, janë më të shpejtë për t’i kuptuar dhe më të qartë për atë që duam të tregojmë në fushë”, përfundoi kapiteni i Kombëtares.
