Ivanka Trump tërhoqi vëmendjen me paraqitjen e saj në darkën shtetërore të organizuar në Shtëpinë e Bardhë për presidentin kinez Xi Jinping dhe bashkëshorten e tij, Peng Liyuan.
44-vjeçarja u shfaq me një fustan të gjatë në ngjyrë blu të hapur, pa mëngë dhe i dekoruar me kristale, me një vlerë prej rreth 6 mijë dollarësh. Veshja është krijim i stilistit të njohur Georges Hobeika dhe spikaste për bustin e strukturuar, qëndisjet e detajuara dhe motivet florale, të kombinuara me elemente dekorative me kristale.
Vajza e presidentit Donald Trump e kompletoi pamjen me grim të theksuar në zonën e syve dhe flokët bionde të mbledhura në njërën anë. Në mbrëmjen gala ajo shoqërohej nga vajza e saj 15-vjeçare, Arabella, e cila u shfaq me një fustan të zi elegant.
Ivanka Trump kishte marrë pjesë edhe më herët gjatë ditës në ceremoninë zyrtare të pritjes së presidentit Xi Jinping dhe bashkëshortes së tij. Për këtë rast, ajo kishte zgjedhur një tjetër veshje në tonet e blusë, të kombinuar me një xhaketë me detaje të bardha florale dhe vathë me perla.
Darka shtetërore, me kod veshjeje zyrtare, u zhvillua në East Room të Shtëpisë së Bardhë, ku presidenti amerikan Donald Trump dhe homologu i tij kinez Xi Jinping mbajtën edhe fjalime.
Mbrëmja ishte pjesë e axhendës zyrtare të vizitës së presidentit kinez në Shtëpinë e Bardhë, në një moment të rëndësishëm për marrëdhëniet mes Shteteve të Bashkuara dhe Kinës.
