Presidenti amerikan Donald Trump priti të premten në Shtëpinë e Bardhë homologun e tij kinez, Xi Jinping, duke përmbyllur një samit që nuk solli marrëveshje të mëdha, por që synoi të ruajë stabilitetin në marrëdhëniet mes dy ekonomive më të mëdha të botës.
Trump dhe Zonja e Parë pritën Xi Jinping dhe bashkëshorten e tij, Peng Liyuan, në Shtëpinë e Bardhë, ku të dy liderët u përshëndetën me një shtrëngim duarsh. Presidenti amerikan nuk iu përgjigj pyetjeve të gazetarëve, mes tyre edhe asaj nëse i kishte kërkuar Kinës të ndalonte blerjen e naftës nga Irani.
Çështja e naftës iraniane mbetet një nga pikat e mosmarrëveshjes mes Uashingtonit dhe Pekinit, ndërsa Shtetet e Bashkuara synojnë të rrisin presionin ekonomik ndaj Teheranit.
Pas takimit, Trump deklaroi se bisedimet me palën kineze kishin sjellë rezultate pozitive.
“Ne kemi bërë hapa të mëdhenj në të mirë të të dyja vendeve”, u shpreh presidenti amerikan, duke shtuar se të dyja palët “do të zhvillojnë shumë bisedime” edhe në vijim.
Nga ana tjetër, Xi Jinping tha se kishte rënë dakord me Trump për t’i “dhënë një përmbajtje të re marrëdhënieve SHBA-Kinë”.
Sipas presidentit kinez, marrëdhëniet mes dy vendeve duhet të bazohen në “stabilitet strategjik”, si dhe në respekt, drejtësi dhe reciprocitet.
Takimi vjen në një periudhë kur marrëdhëniet mes Uashingtonit dhe Pekinit mbeten të tensionuara për çështje që përfshijnë tregtinë, tarifat, energjinë dhe politikat ndaj Iranit, ndërsa të dyja palët po përpiqen të shmangin përshkallëzimin e mëtejshëm të mosmarrëveshjeve.