Lionel Richie po merr disa ditë pushim për t’u rikuperuar pasi iu nënshtrua një procedure mjekësore për trajtimin e fibrilacionit atrial, një çrregullim që shkakton rrahje të çrregullta të zemrës.
Lajmi u konfirmua nga përfaqësuesi i këngëtarit 77-vjeçar, i cili bëri të ditur se procedura shkoi sipas planit dhe se artisti është në gjendje të mirë.
Lionel iu nënshtrua një procedure të zakonshme për fibrilacionin atrial. Mjeku tha se gjithçka shkoi në mënyrë perfekte. Lionel është shumë mirë, por do të marrë pak kohë pushim dhe së shpejti do të rikthehet në skenë
-deklaroi përfaqësuesi i tij.
Problemet shëndetësore kanë ardhur në një periudhë të ngarkuar për Richien, i cili ishte në turne me Earth, Wind & Fire. Këngëtari kishte përjetuar edhe më herët shqetësime gjatë performancave, duke detyruar anulimin ose shtyrjen e disa koncerteve.
Në qershor, Richie u detyrua të ndërpresë një koncert pasi u ndje i trullosur në skenë. Më vonë, në gusht, ai u shtrua në spital pas një performance në St. Louis, ku iu kryen kontrolle kardiake.
Pas procedurës së fundit, disa nga koncertet e planifikuara me Earth, Wind & Fire janë anuluar, ndërsa këngëtari do të fokusohet për momentin te rikuperimi.
Pavarësisht ndërprerjes së përkohshme të turneut, ekipi i tij ka dhënë sinjale pozitive për rikthimin e tij në muzikë. Richie ka gjithashtu të planifikuara një seri koncertesh në Las Vegas gjatë muajve tetor dhe nëntor.
Lionel Richie është një nga emrat më të njohur të muzikës amerikane, me hite si “Hello”, “All Night Long” dhe “Dancing on the Ceiling”. Ai është gjithashtu fitues i katër çmimeve Grammy dhe vazhdon të jetë pjesë e jurisë së “American Idol”.
