Trump refuzon armëpushimin 7-ditor të Iranit, Teherani vendos kushte për Hormuzin
Presidenti i SHBA-së, Donald Trump, ka refuzuar propozimin e Iranit për një armëpushim fillestar shtatëditor, ndërsa Teherani ka paraqitur një plan për rihapjen e Ngushticës së Hormuzit me kushte të caktuara.
Sipas Wall Street Journal, Trump u ka thënë bashkëpunëtorëve se pret që bombardimet amerikane ndaj Iranit të vazhdojnë edhe në nëntor, pas zgjedhjeve të mesmandatit në SHBA. Reuters thekson se nuk ka mundur t’i verifikojë në mënyrë të pavarur këto informacione.
Ministri i Jashtëm i Iranit, Abbas Araghchi, deklaroi se Teherani i ka përcjellë Uashingtonit një plan konkret shtatëditor për rihapjen e Ngushticës së Hormuzit.
Sipas tij, nëse plotësohen kushtet e kërkuara, ngushtica mund të rihapet dhe qarkullimi i anijeve të rikthehet brenda shtatë ditësh.
Sipas propozimit iranian, brenda shtatë ditësh duhet të përfundojnë armiqësitë në të gjitha frontet, përfshirë Libanin.
Teherani kërkon gjithashtu heqjen e bllokadës së porteve iraniane dhe sanksioneve ndaj naftës, si dhe zhbllokimin e aseteve iraniane të ngrira.
Një zyrtar iranian deklaroi për Reuters se Irani nuk ka ndërmend të bëjë lëshime lidhur me programin e tij bërthamor, edhe nëse SHBA-ja pranon propozimin për rihapjen e Ngushticës së Hormuzit.
Ndërkohë, situata në Lindjen e Mesme vijon të përshkallëzohet pas shtatë muajsh luftë mes SHBA-së dhe Iranit. Në të njëjtën kohë, rebelët Houthi të Jemenit kanë ndërmarrë një seri sulmesh me raketa dhe dronë ndaj Arabisë Saudite, duke rritur shqetësimet për sigurinë e lundrimit në rajon.
