Policia e Shtetit ka hartuar një plan të posaçëm masash për garantimin e rendit dhe sigurisë para, gjatë dhe pas ndeshjes së futbollit mes Shqipërisë dhe Bjellorusisë, e cila do të zhvillohet mbrëmjen e sotme, në orën 20:45, në stadiumin “Air Albania”.

Plani parashikon angazhimin e të gjitha strukturave të Policisë së Shtetit, në bashkëpunim me Policinë Bashkiake të Tiranës, me qëllim garantimin e sigurisë dhe lehtësimin e qarkullimit të automjeteve në kryeqytet.

Për këtë arsye, gjatë datës 26 shtator 2026, nga ora 17:00 deri në përfundim të ndeshjes, do të aplikohen kufizime të qarkullimit në disa prej akseve rrugore pranë stadiumit.

Rrugët që do të bllokohen janë:

Bulevardi “Dëshmorët e Kombit”, nga fast food-i “Laguna”, pranë urës së ish-Hotel Dajtit;

Rruga “Papa Gjon Pali II”, te kryqëzimi i RTSH-së;

Rruga “Dervish Hima”, pranë Ambasadës së SHBA-së;

Rruga “Asim Zeneli”, pranë Ambasadës së SHBA-së;

Rruga “Themistokli Gërmenji”, në hyrje;

Rruga “Ismail Qemali”, te kryqëzimi i RTSH-së;

Rruga “Lekë Dukagjini”, pranë ish-Gardës së Republikës, e cila do të shërbejë si koridor hyrjeje për në parkimin e përcaktuar vetëm për mjetet e autorizuara nga FSHF-ja;

Rruga “Abdyl Frashëri”, pranë kryqëzimit të Librit Universitar.

Ndërkohë, te sheshi “Willson”, lëvizja në drejtim të rrugës “Sami Frashëri” do të devijohet pak para përfundimit të ndeshjes.

Policia bën me dije se Rruga e Elbasanit, Unaza dhe bulevardi “Bajram Curri” do të jenë të lira për qarkullimin e automjeteve.

Në kuadër të masave të sigurisë, punonjësit e Policisë së Shtetit do të kryejnë kontrolle të imtësishme ndaj tifozëve përpara hyrjes në stadium. Kontrollet do të synojnë parandalimin e futjes së sendeve dhe materialeve që mund të rrezikojnë sigurinë e pjesëmarrësve.

Në stadium nuk do të lejohet futja e banderolave me përmbajtje raciste, fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve apo produkteve për përdorim kozmetik, si dhe sendeve të tjera të forta apo të rrezikshme për jetën dhe shëndetin.

Policia u ka bërë thirrje tifozëve që të paraqiten pranë hyrjeve të stadiumit duke filluar nga ora 18:30. Sipas autoriteteve, për shkak të fluksit të lartë të tifozëve, personat që paraqiten pak para nisjes së ndeshjes mund të përballen me vonesa dhe të humbasin mundësinë për të hyrë në stadium në kohë.

Për garantimin e rendit dhe sigurisë publike, Policia e Shtetit ka angazhuar qindra punonjës policie, të cilët do të jenë të pranishëm gjatë gjithë zhvillimit të aktivitetit sportiv dhe do t’u ofrojnë tifozëve ndihmë dhe informacion në rast nevoje.

Ndeshja Shqipëri-Bjellorusi do të luhet në orën 20:45 në stadiumin “Air Albania”, ndërsa masat e policisë do të vijojnë para, gjatë dhe pas përfundimit të saj.