Tre shtetas shqiptarë dyshohet se ndodhen ende nën rrënojat e një ndërtese të shembur në Athinë, pas shpërthimit të fuqishëm që tronditi zonën e Plakës një ditë më parë.
Gjashtë persona dyshohet se kanë mbetur të bllokuar nën rrënoja, ndërsa ekipet e emergjencës vijojnë kërkimet në vendngjarje.
Shpërthimi ndodhi pak para orës 08:00, në një ndërtesë të vjetër dykatëshe në rrugën “Lysikratous”, përballë Shtyllave të Zeusit Olimpik. Forca e shpërthimit shkaktoi shembjen e godinës, ndërsa një kalimtar mbeti i plagosur lehtë nga copëzat e materialeve të shpërndara.
Pas ngjarjes, ekipet zjarrfikëse ndërhynë edhe në një godinë pranë vendit të shpërthimit, ku arritën të nxjerrin dy gra, njëra prej tyre e moshuar.
Të dyja u transportuan në spitalin “Georgios Gennimatas”, ku morën ndihmën mjekësore.
Ndërkohë, operacioni i kërkim-shpëtimit vijon në ndërtesën e shembur. Ekipet po punojnë mes rrënojave për të lokalizuar personat që dyshohet se kanë mbetur të bllokuar, mes tyre edhe tre shtetasit shqiptarë.
