Vizita apostolike e Papa Leones XIV në Francë vijoi të shtunën, më 26 shtator, me një sërë takimesh në Paris. Pas angazhimeve në kryeqytet, kreu i Kishës Katolike u nis drejt Lourdes, një prej qendrave më të rëndësishme të pelegrinazhit katolik.
Të lidhura
None found
Programi i paradites përfshiu vizitën në qendrën e pritjes “Maison Bakhita”, ku Papa u takua me përfaqësues të komunitetit të migrantëve. Më pas, ai zhvilloi një takim në Institutin Katolik të Parisit me katekumënët, të rritur që përgatiten për të marrë sakramentin e pagëzimit.
E themeluar në vitin 2018 nga Kryedioqeza e Parisit, “Maison Bakhita” synon të mbështesë pritjen dhe integrimin e migrantëve.
Gjatë qëndrimit në këtë qendër, Leone XIV kujtoi Shën Bakhitën, ish-skllaven sudaneze që u shpall shenjtore, duke nënvizuar kontributin e grave në ndërtimin e një “qytetërimi të dashurisë”. Ai shprehu mirënjohje për personat që punojnë aty dhe vuri theksin te nevoja për ambiente ku njerëzit të gjejnë mbështetje, besim dhe shpresë.
“Askush nuk është aq i varfër sa të mos ketë diçka për të dhënë; askush nuk është aq i pasur sa të mos ketë diçka për të marrë”, tha Papa.
Gjatë takimit me katekumënët, Papa deklaroi se ishte befasuar nga numri i njerëzve që po afrohen përsëri me besimin, veçanërisht nga të rriturit që kërkojnë të marrin sakramentet e inicimit të krishterë.
Sipas tij, ky zhvillim merr një rëndësi të veçantë në Francë, ku shoqëria karakterizohet nga një nivel i lartë sekularizimi. Ai e përshkroi përvojën e këtyre personave si një dëshmi të gjallë të veprimit të hirit të Zotit, përtej shpjegimeve statistikore dhe sociologjike.
Të dhënat e Konferencës Ipeshkvnore Franceze tregojnë se gjatë Pashkëve të këtij viti në Francë u pagëzuan 21,386 katekumënë. Prej tyre, 13,234 ishin të rritur dhe 8,152 adoleshentë.
Numri i përgjithshëm shënoi një rritje prej rreth 20% në raport me vitin 2025. Te të rriturit rritja ishte rreth 28%, ndërsa te adoleshentët rreth 10%.
Leone XIV u kërkoi komuniteteve katolike që afrimin e të rinjve dhe të rriturve me besimin ta shoqërojnë me një formim të përshtatshëm shpirtëror.
Gjatë pasdites, Papa kremtoi meshën në Place de la Concorde. Ceremonia u ndoq nga rreth 700 mijë besimtarë, ndërsa një numër i madh njerëzish e pritën atë përgjatë Champs-Élysées, nga Harku i Triumfit deri në shesh, me flamuj dhe himne.
Në fjalën drejtuar të rinjve, Papa i cilësoi ata si “Kisha e sotme” dhe vlerësoi entuziazmin e energjinë e tyre.
Ai u bëri thirrje katolikëve francezë që besimin të mos e kufizojnë në një përvojë private, por ta shndërrojnë atë në një burim shprese për shoqërinë.
“Mos e mbani besimin në Jezu Krishtin vetëm për veten tuaj, por lëreni të rrjedhë për të ushqyer dhe mbushur me shpresë njerëzit që takoni”, u shpreh Leone XIV.
Ai theksoi gjithashtu se besimtarët duhet ta çojnë shpresën “aty ku mbizotëron dekurajimi dhe thatësia shpirtërore”.
Pas përfundimit të aktiviteteve në Paris, Papa u nis drejt Lourdes, në jugperëndim të Francës. Atje pritet të vizitojë shenjtëroren e njohur mariane dhe të drejtojë lutjen pranë shpellës ku, sipas traditës katolike, Shën Bernadeta Soubirous përjetoi shfaqjet e Virgjëreshës Mari.
Qëndrimi në Lourdes përbën një nga pikat kryesore të udhëtimit apostolik të Papa Leones XIV në Francë.
Në ceremoninë e Parisit morën pjesë ish-presidenti Nicolas Sarkozy, presidenti i republikanëve Bruno Retailleau, presidentja e rajonit Île-de-France Valérie Pécresse, ish-kryeministri François Fillon, Gabriel Attal, Dominique de Villepin dhe Eric Zemmour.
Pjesëmarrja ishte parashikuar edhe për ish-kryeministrin Édouard Philippe, Marine Le Pen dhe kryeministrin aktual Sébastien Lecornu.
Presidenti Emmanuel Macron mungoi në meshë. Presidenca franceze kishte bërë të ditur më herët se ai nuk do të merrte pjesë në asnjërën prej meshave të zhvilluara gjatë kësaj vizite.
