Dominique Crenn, një prej emrave më të njohur të gastronomisë ndërkombëtare, po rikthen vëmendjen te pabarazia gjinore në nivelet më të larta të industrisë. Chef-ja franceze, themeluese e Atelier Crenn në San Francisco, mbetet gruaja e parë dhe e vetme në Shtetet e Bashkuara që ka mbajtur tre yje Michelin dhe thotë se është koha që më shumë gra të marrin njohjen që meritojnë.
Crenn e ka ngritur çështjen ndërsa Michelin vazhdon zgjerimin e guidave të tij në tregje të reja. Sipas saj, problemi nuk është mungesa e grave të talentuara në kuzhina, por fakti që shumë prej tyre nuk marrin të njëjtën dukshmëri dhe mundësi për të arritur në pozicionet më të larta.
Tema është interesante sepse gastronomia profesionale ka ndryshuar shumë në mënyrën si prezantohet publikisht. Chef-at janë sot personazhe televizive, autorë librash, sipërmarrës dhe marka më vete. Megjithatë, kur fokusi kalon te restorantet me tre yje Michelin, përfaqësimi i grave vazhdon të jetë shumë më i vogël.
Crenn vetë ka ndërtuar një karrierë që e ka vendosur shpesh jashtë modelit tradicional të fine dining. Kuzhina e saj është lidhur me storytelling, artin dhe kujtesën personale, ndërsa ajo ka folur vazhdimisht për nevojën që industria të krijojë një kulturë pune më gjithëpërfshirëse.
