Profesori universitar Arsim Bajrami e ka përshkruar si “tronditje kombëtare” vendimin e fundit të Gjykatës Speciale në Hagë, duke vlerësuar se ai ka shkaktuar traumë te qytetarët e Kosovës pas një pritjeje dhjetëvjeçare, që nga themelimi i këtij institucioni.
Të lidhura
None found
Në emisionin “Info Magazine”, Bajrami deklaroi se vendimi ka cenuar besimin e qytetarëve dhe të Kuvendit të Kosovës, i cili, sipas tij, kishte marrë një vendim jashtëzakonisht të vështirë për krijimin e kësaj gjykate, një hap që një shtet normal nuk do ta ndërmerrte.
Ai tha se, në vend të një procesi të rregullt gjyqësor dhe të një drejtësie evropiane të mbështetur te sundimi i ligjit, është dhënë një vendim që e konsideroi skandaloz dhe politik. Sipas Bajramit, ky vendim rrezikon të komprometojë edhe procesin e shtetndërtimit të Kosovës.
Kritikat e tij u përqendruan veçanërisht te fjalimi hyrës i kryetarit të trupit gjykues, të cilin e cilësoi si tërësisht politik. Bajrami tha se në atë fjalim u paraqit një interpretim i padrejtë i historisë, duke krijuar mundësinë që një qytetar evropian i painformuar të mendonte se shqiptarët kishin kryer agresion dhe kishin zhvilluar luftë kundër Serbisë.
Ai theksoi se në fjalim nuk u përmend aspak fakti që Ushtria Çlirimtare e Kosovës ishte krijuar dhe vepronte si organizatë çlirimtare, me synim mbrojtjen nga agresioni dhe gjenocidi i ushtruar nga Serbia.
