Presidenti i Manchester City-t letrë tifozëve pas vendimit të Premier League: Jemi të pafajshëm, do të dalim fitimtarë

Presidenti i Manchester City-t, Khaldoon Al Mubarak, ka shprehur përmes një letre hapat e ardhshëm që do të ndërmarrë klubi, si dhe bindjen se ai do të shpallet i pafajshëm.

Siç dihet që nga dita e premte, skuadra angleze u shpall fajtore për shumicën e akuzave për shkelje të rregulloreve të Premier League.

Që nga ai moment ka nisur një debat i madh rreth dënimeve. Ende nuk dihet se cilat do të jenë ato, megjithëse në këtë moment nuk konsiderohet i mundshëm heqja e titujve.

Letra e  Khaldoon Al Mubarak u bë e ditur nga klubi dhe thotë:

“Kam qenë anëtar i këtij Klubi për 18 vjet. Kam pasur privilegjin të jem me ju në Etihad, në Wembley dhe në Stamboll. Ky Klub do të thotë shumë për mua dhe ju më keni treguar dhe thënë, herë pas here, se sa shumë do të thotë Manchester City për ju. Kjo është arsyeja pse po ju shkruaj sot.

Pas raportimeve në media të së premtes, shumë prej jush ndoshta e kanë kaluar mbrëmjen duke iu përgjigjur pyetjeve dhe mesazheve nga miqtë, familja dhe kolegët. Edhe unë gjithashtu.

Ja çfarë i thashë familjes sime: Procesi i Premier Ligës ka ende shumë për të bërë dhe besimi ynë, si dhe vendosmëria jonë për të vërtetuar pafajësinë e klubit, mbetet po aq i fortë sa kur filloi e gjithë kjo çështje.

Ka kaq shumë gjëra që do të doja të ndaja me ju në mënyrë që të kuptoni pse ndihemi kaq të sigurt në qëndrimin tonë. Megjithatë, konfidencialiteti i rreptë i procesit ligjor dhe vendosmëria jonë për ta respektuar atë do të thotë që unë nuk jam në gjendje ta bëj këtë në këtë kohë. Edhe kjo letër i është nënshtruar një sërë kontrollesh ligjore për t’u siguruar që është në përputhje me rregullat përkatëse.

Ju kërkoj ta lexoni me kujdes deklaratën më poshtë, të cilën e publikuam të premten, si dhe deklaratën që e publikuam në shkurt 2023. Çdo fjalë ka rëndësi dhe mbetet e vlefshme.

Ndërsa disa kanë nxjerrë përfundime të nxituara dhe ka shumë zhurmë përreth nesh, asgjë nuk ka ndryshuar. Ne jemi përballur me sfida së bashku më parë dhe kemi dalë fitimtarë. Ka ende shumë që duan të minojnë vrullin e Klubit tonë. Nuk do t’ua japim këtë shans.

Kemi disa kohë emocionuese përpara pas pushimit të ndeshjeve ndërkombëtare. Pas dy javësh udhëtojmë për në Anfield dhe më pas presim Paris Saint-Germain në Ligën e Kampionëve në Etihad – momente që na japin mundësinë të festojmë forcën e familjes Manchester City.

Faleminderit, si gjithmonë, për mbështetjen tuaj të vazhdueshme.
Khaldoon Al Mubarak.”