“Thumb” për Silvinjon? Muçi: Moshatarët e mi kanë nga 30-40 ndeshje me Kombëtaren

Ernest Muçi ishte një nga protagonistët kryesorë në fitoren 2-0 që Shqipëria arriti ndaj Bjellorusisë në "Air Albania".

Sulmuesi kuqezi, i cili shënoi golin e dytë të sfidës, u shpreh mjaft i lumtur pas ndeshjes për kontributin e dhënë.

Në deklaratën e tij, 25-vjeçari zbuloi se kjo ishte vetëm ndeshja e tij e katërt si titullar me përfaqësuesen në pesë vite grumbullim.

Muçi nënvizoi se te kuqezinjtë ka një konkurrencë të fortë, por ai mbetet gjithmonë i gatshëm për të dhënë maksimumin

Ai pranoi se ndjesia e të mos luajturit shpesh sjell më shumë emocione dhe presion për t'i bërë krenarë tifozët. Futbollisti shtoi se me më shumë minuta në fushë do të fitojë edhe përvojën e nevojshme në nivel ndërkombëtar, duke hedhur dhe një "thumbë" për ish-trajnerin Silvinjo. 

“Në Kombëtare ka shumë konkurrencë. Jam gati gjithmonë kur thërritem të jap maksimumin. Ishte një ndeshje e rëndësishme dhe donim ta nisnim me fitore, për vendin e parë në grup.

Ishte ndeshja e katërt në formacion te Kombëtarja. Kam pesë vite këtu nga debutimi. Jam i lumtur që ndihmova ekipin. Jam shumë i lumtur që ia dolëm të fitojmë.

Kur nuk luan shumë është emocioni, pritshmëria nga tifozët. Do t’i bësh krenarë. Pas golit sikur lirohesh. Moshatarët e mi në Kombëtare kanë nga 30-40 ndeshje në Kombëtare. Nëse do të luajë më shumë do fitoj më shumë eksperiencë.

Salah është një lojtar superstar. Është me këmbë në tokë dhe komunikon me të gjithë. Jam i lumtur që luaj me të. Kam mësuar shumë këto dy muaj.”, deklaroi Muçi.