Dueli Austri–Kosovë në Ligën e Kombeve nuk përfaqëson vetëm përplasjen e dy skuadrave që kërkojnë të vijojnë serinë e fitoreve. Në pankinat e tyre do të qëndrojnë Franco Foda dhe Ralf Rangnick, të njohur prej rreth tri dekadash, por që për herë të parë do të jenë kundërshtarë në një ndeshje.
Të lidhura
None found
Rrugët e dy trajnerëve u kryqëzuan që në vitet ’90, kur të dy ishin pjesë e futbollit gjerman. Në atë periudhë, Foda ishte futbollist i Stuttgartit dhe po rikuperohej nga një dëmtim, ndërsa Rangnick merrej me procesin e rehabilitimit pranë klubit.
Gjatë kësaj kohe, Rangnick punoi me Fodën, ndërsa lidhja profesionale mes tyre vazhdoi edhe në vitet pasuese. Siç ka rrëfyer vetë trajneri i Kosovës, ata mbajtën kontakte edhe kur Foda drejtonte Austrinë dhe Rangnick ishte në krye të Leipzigut, duke biseduar edhe për futbollistë të ndryshëm.
Të dielën, në Vjenë, kjo marrëdhënie e gjatë do të përballet me një situatë të re. Foda do të udhëheqë Kosovën, ndërsa Rangnick do të drejtojë Austrinë, duke u vendosur përballë njëri-tjetrit për herë të parë në karrierën e tyre si trajnerë.
Një element tjetër që i jep rëndësi kësaj përballjeje është fakti se Foda ka qenë përzgjedhës i Austrisë përpara se drejtimin e përfaqësueses austriake ta merrte Rangnick.
Pas kësaj periudhe, Foda rikthehet në Austri në rolin e kundërshtarit, këtë herë për të drejtuar Kosovën kundër ekipit që Rangnick e drejton prej vitit 2022.
Pas 30 vitesh njohje, bashkëpunimi dhe respekti të ndërsjellë, dy trajnerët do të kenë më në fund një përballje direkte. Takimi në Vjenë i shton sfidës Austri–Kosovë një histori të veçantë edhe përtej asaj që do të ndodhë në fushë.
