Shqipëria e nis me fitore Ligën e Kombeve, mposht 2-0 Bjellorusinë

Kombëtarja e Shqipërisë e ka nisur me fitore aventurën e re në Ligën e Kombeve.

Kuqezinjtë triumfuan 2-0 ndaj Bjellorusisë të shtunën mbrëma në stadiumin “Air Albania” në Tiranë, në ndeshjen e vlefshme për Grupin C1.

Shqipëria e nisi takimin më kërkuese, duke ushtruar presion dhe duke iu afruar vazhdimisht portës kundërshtare. Goli i avantazhit erdhi në minutën e 34-t, kur Kristjan Asllani ishte i saktë nga pika e bardhë e penalltisë.

11-metërshin për Shqipërinë e fitoi kapiteni Berat Gjimshiti, i cili u pengua brenda zonës nga Artem Kontsevoy. Asllani nuk gaboi dhe kaloi kuqezinjtë në epërsi.

Shqipëria nuk u tërhoq pas golit dhe vazhdoi të sulmonte në kërkim të një avantazhi më të madh. Përpjekjet u shpërblyen në fund të pjesës së parë.

Në minutën e dytë shtesë, Ernest Muçi realizoi një gol të bukur për 2-0, duke i dhënë Shqipërisë një avantazh të dyfishtë para pushimit.

Me këtë rezultat, kuqezinjtë e nisën në mënyrën më të mirë këtë edicion të Ligës së Kombeve.