Marshimi i debatueshëm i Urdhrit Portokalli do të kalojë sërish në një zonë nacionaliste të Irlandës së Veriut, për herë të parë pas afro 30 vitesh, pas vendimit të Gjykatës së Lartë në Belfast.
Të lidhura
None found
Gjykata refuzoi kërkesën për ndalimin e paradës dhe konfirmoi se vendimi i Komisionit të Paradave, i cili e kishte autorizuar marshimin, duhet të zbatohet.
Parada e Drumcree, e lidhur me protesta dhe përplasje të dhunshme gjatë viteve ’90, do të zhvillohet përgjatë Garvaghy Road nën disa kushte të përcaktuara. Ajo duhet të nisë jo më vonë se ora 08:00 dhe në të mund të marrin pjesë deri në 35 persona. Pjesëmarrja e grupeve muzikore dhe mbështetësve është e ndaluar.
Vendimi solli një varg përplasjesh ligjore gjatë fundjavës. Banorët e Garvaghy Road kundërshtuan rikthimin e marshimit dhe shprehën shqetësimin se ai mund të përshkallëzojë tensionet në zonë.
Përfaqësuesit e Urdhrit Portokalli, nga ana tjetër, kanë thënë se parada do të zhvillohet në mënyrë paqësore dhe duke respektuar ligjin.
Gjatë natës, në zonë u shfaqën edhe protestues, ndërsa autoritetet kanë përforcuar masat e sigurisë. Rreth 200 oficerë policie nga Skocia pritet t’i bashkohen operacionit të policisë së Irlandës së Veriut.
Debati për marshimin në Drumcree ka nisur që në mesin e viteve ’90 dhe mbetet një prej çështjeve më të ndjeshme të historisë së trazuar politike dhe komunitare të Irlandës së Veriut.
