Një operacion i Policisë së Tiranës, i zhvilluar pas katër muajsh hetime, ka goditur disa grupe që dyshohet se shpërndanin lëndë narkotike pranë shkollave 9-vjeçare dhe të mesme, si dhe në zona të ndryshme të kryeqytetit. Në total janë identifikuar 52 persona, 38 prej të cilëve janë arrestuar, ndërsa 14 të tjerë janë shpallur në kërkim.
Operacioni i koduar “Shkolla të Pastra” u finalizua nga Sektori për Hetimin e Narkotikëve në Drejtorinë Vendore të Policisë Tiranë, në bashkëpunim me Prokurorinë e Tiranës. Nga 38 personat e arrestuar, 31 janë kapur gjatë ekzekutimit të masave të sigurisë “Arrest në burg”, ndërsa 7 të tjerë ishin arrestuar gjatë periudhës së hetimit.
Sipas policisë, grupet e identifikuara e shpërndanin drogën pranë shkollave dhe në zona të ndryshme të Tiranës. Në disa raste, për të shmangur vëmendjen e shërbimeve policore, lënda narkotike transportohej dhe shpërndahej përmes monopatinave, por edhe duke përdorur shërbime taksie dhe dërgesash.
Gjatë hetimeve dhe ekzekutimit të masave të sigurisë janë sekuestruar 1 kilogram e 75 gramë heroinë, 1 kilogram e 265 gramë kokainë dhe 685 gramë kanabis. Në kuadër të operacionit janë gjetur gjithashtu një pistoletë, 90 fishekë, dy peshore elektronike, 12 automjete, 35 telefona celularë dhe sende të tjera të kundërligjshme.
Policia ka bërë publike edhe emrat e 31 personave ndaj të cilëve janë ekzekutuar masat e sigurisë “Arrest në burg”: Genti Jaupi, Endrit Balla, Eduart Oleff, Bledar Kasa, Erlind Vlashi, Denis Shoti, Armando Koçi, Ernest Hamollari, Janaq Nakuçi, Shpëtim Çiçiku, Engrid Henaj, Enis Maliqaj, Franci Papajani, Klement Metallari, Ram Tafaj, Klajdi Malaj, Isuf Dine, Ferit Xhani, Bestar Malaj, Igli Avxhi, Arnold Lila, Sefer Allushi, Elton Tola, Arbias Prenga, Vilson Mete, Durim Matja, Eljado Prendaj, Nikolla Shkarpa, Armando Kuqi, Taulant Alstafa dhe Volf Ramadani.
Ndërkohë, gjatë fazës hetimore janë arrestuar edhe shtatë persona të tjerë: Ksainel Caka, Gezim Muhameti, Zhuljan Prenci, Erald Tafani, Darlin Shahinas, Donaldo Frate dhe Marin Tabaku.
Për 14 personat e tjerë të identifikuar si pjesë e këtyre grupeve, policia ka vijuar me shpalljen në kërkim. Gjeneralitetet e tyre nuk janë bërë publike, pasi hetimi vijon dhe autoritetet po punojnë për kapjen e tyre dhe dokumentimin e plotë të veprimtarisë së dyshuar kriminale.
Sipas hetimeve, aktiviteti i grupeve ishte përqendruar në shitjen e lëndëve narkotike në afërsi të shkollave 9-vjeçare dhe të mesme, por edhe në zona të tjera të kryeqytetit. Materialet procedurale i janë referuar Prokurorisë së Tiranës për veprime të mëtejshme.
Policia e Tiranës deklaron se do të vijojë kontrollet dhe hetimet për garantimin e sigurisë në shkolla dhe për parandalimin e goditjen e veprimtarive kriminale që cenojnë sigurinë e nxënësve.