Aktorja amerikane Dakota Johnson ka ndarë detaje personale mbi seksualitetin, marrëdhëniet sentimentale dhe rritjen e saj në një prej familjeve më të njohura të Hollywood-it. Ajo ka treguar se nëna e saj, aktorja Melanie Griffith, ka ndikuar fort në mënyrën se si e percepton trupin, dashurinë dhe vetëbesimin.
Të lidhura
None found
“Jam një person seksual. Nëna ime më rriti që të jem vërtet krenare për trupin tim dhe ta dua atë”, është shprehur Johnson.
Sipas 36-vjeçares, Griffith ka qenë e drejtpërdrejtë me të kur bëhej fjalë për trupin dhe seksin. Kjo qasje, sipas aktores, e ka ndihmuar të ndihet më e sigurt edhe gjatë xhirimit të skenave intime.
E njohur në të gjithë botën për interpretimin e Anastasia Steele në trilogjinë “Fifty Shades of Grey”, Johnson tha se seksualiteti nuk duhet të shoqërohet me turp. Ajo beson se skenat intime mund të kenë vlerë artistike kur integrohen siç duhet në rrëfimin e një filmi.
Gjatë bisedës, aktorja shpjegoi edhe se si realizohen këto sekuenca në platotë filmike. Për një periudhë të gjatë, ajo ka përdorur vetëm simulimin gjatë xhirimeve, ndërsa së fundmi ka bashkëpunuar me një koordinatore intimiteti, e cila e ka ndihmuar të zbulojë mënyra të reja për interpretimin e tyre.
“Ka raste kur kam xhiruar një skenë seksi vetëm, sepse isha e vetmja në kuadër. Thjesht lëvizja dhe bëja sikur po përjetoja momentin”, ka rrëfyer Johnson.
Kur flet për dashurinë, Dakota Johnson nuk mendon se ekziston një model i vetëm që mund të quhet i drejtë për të gjithë. Ajo ka qenë në lidhje me disa figura të njohura të muzikës dhe për disa vite ishte partnere e frontmenit të Coldplay, Chris Martin. Aktualisht, emri i saj është lidhur në mënyrë të përfolur me reperin Machine Gun Kelly.
Aktorja nënvizoi se secili duhet të ketë lirinë të vendosë se si dëshiron të jetojë dhe të dashurojë, qoftë duke zgjedhur një lidhje të vetme apo forma të tjera marrëdhëniesh.
Johnson foli edhe për prejardhjen e saj familjare. Babai i saj është aktori Don Johnson, ndërsa gjyshja, Tippi Hedren, është një aktore e njohur veçanërisht për bashkëpunimin me regjisorin Alfred Hitchcock.
Hapat e parë në kinema i bëri në moshën nëntëvjeçare, kur luajti krah nënës së saj në filmin “Crazy in Alabama”, prodhim i vitit 1999.
Ajo e përshkruan rritjen në një familje të famshme si një përvojë me privilegje, por edhe me vështirësi të mëdha. Prindërit e saj kanë folur publikisht për problemet me alkoolin dhe drogën, ndërsa Johnson nisi terapinë kur ishte vetëm trevjeçare, për shkak të situatës së trazuar në familje.
Karriera e saj mori një kthesë vendimtare në vitin 2015, kur u zgjodh për rolin e Anastasia Steele në “Fifty Shades of Grey”, ku interpretoi përkrah Jamie Dornan. Megjithëse trilogjia e shndërroi në një yll ndërkombëtar, aktorja ka pranuar se marrja e këtij roli e frikësoi.
“Po të kisha ditur atëherë se si do të ishte, nuk mendoj se dikush do ta kishte bërë. Por nuk pendohem”, ka deklaruar ajo.
Projekti i saj i radhës është filmi “Verity”, i cili pritet të publikohet së shpejti. Në të, Johnson luan së bashku me Anne Hathaway dhe Josh Hartnett. Filmi është mbështetur në romanin e Colleen Hoover dhe trajton një histori të errët e të ndërlikuar dashurie.
Edhe pse gëzon famë të madhe, aktorja pranon se ende përballet me ankthin dhe frikën nga skena. Për ta mbajtur nën kontroll këtë gjendje, ajo përdor meditimin dhe ushtrimet e frymëmarrjes, ndërsa ceremonitë e ndarjes së çmimeve mbeten ndër situatat që i shkaktojnë më shumë tension.
