Alarm pranë bazës amerikane në Britani, arrestohen disa persona dhe evakuohen banorët

Një incident i rëndë është regjistruar pranë bazës ajrore RAF Fairford në Gloucestershire të Britanisë, e cila përdoret nga Forcat Ajrore të SHBA-së.

Policia ka arrestuar disa persona nën dyshimin për vepra penale sipas Aktit të Eksplozivëve, ndërsa një ekip special i ushtrisë britanike për çaktivizimin e mjeteve shpërthyese po kontrollon disa automjete në zonë.

Si masë sigurie, disa banesa në zonën e Whelford janë evakuuar dhe është vendosur një kordon policor. Në zonë janë parë rreth 30 automjete të shërbimeve të emergjencës, ndërsa policia e armatosur ka bllokuar hyrjen në portën kryesore të bazës.

Autoritetet britanike e kanë cilësuar situatën si një “incident madhor”, ndërsa kanë deklaruar se ngjarja konsiderohet e lokalizuar dhe nën kontroll. Deri tani nuk janë bërë të ditura detaje mbi natyrën e dyshimeve apo mbi personat e arrestuar

RAF Fairford është përdorur gjatë muajve të fundit nga Forcat Ajrore amerikane për operacione ushtarake dhe strehon personel të SHBA-së.