Alarm pranë bazës ajrore në Britani, çaktivizohen bombat, evakuohen banorët 

Një incident është raportuar në fshatin Whelford, pranë bazës ajrore britanike RAF Fairford, ku ndodhen edhe forca të Forcave Ajrore të Shteteve të Bashkuara.

Pas incidentit, policia e Gloucestershire ka evakuuar disa banorë të zonës dhe i ka dërguar në një qendër sportive, ndërsa hetimet për ngjarjen vijojnë. Sipas autoriteteve, disa persona janë arrestuar nën dyshimin se kanë kryer vepra penale që lidhen me shkeljen e ligjeve britanike për eksplozivët.

Në vendngjarje janë dërguar edhe specialistë të ushtrisë britanike për çaktivizimin dhe asgjësimin e mjeteve shpërthyese. Ekipet po kontrollojnë disa automjete, ndërsa policia ka vendosur një kordon sigurie për të kufizuar hyrjen në zonë.

Autoritetet kanë deklaruar se situata është nën kontroll dhe se incidenti duket i kufizuar në një zonë të caktuar.

Në vendngjarje ka një prani të madhe të policisë dhe shërbimeve të emergjencës, përfshirë ekipet e specializuara për ndërhyrje në raste të rrezikshme. Hetimet për të sqaruar rrethanat e incidentit janë ende në vazhdim.