Te fundit
Asambleja e OKB, ministri i Jashtëm rus sulmon Evropën: Pengon negociatat e paqes me Ukrainën
27 Shtator 2026, 13:10Bota
TEMA
Rusia është ngjitur sërish në podiumin e Asamblesë së Përgjithshme të OKB-së, dhe sërish ka drejtuar akuza ndaj kontinentit të vjetër. Fajin e kemi ne evropianët, thotë “ujku i vjetër” i diplomacisë ruse, ministri i Jashtëm Sergej Lavrov, nëse nuk po arrin të varroset sëpata e luftës në Ukrainë: “Evropa po bën gjithçka të mundshme për të penguar negociatat e paqes, për të cilat administrata Trump është e interesuar”.
Ka fjalë për të gjithë, por veçanërisht për një: Gjermaninë, e cila “nuk i ka marrë mësimet e Luftës së Dytë Botërore”. Pikërisht Berlinit i kushton pjesët më të ashpra të fjalimit të tij, e megjithatë pikërisht në atë drejtim vjen hapja më befasuese: shtrëngimi i duarve, në një sallë anësore, mes Lavrovit dhe ministrit të Jashtëm gjerman Johann Wadephul, përpara një takimi po aq të shkurtër sa edhe të papritur mes dy qeverive që kanë marrëdhënie tejet të këqija.
Përballë Asamblesë, Lavrovi është jashtëzakonisht i ashpër dhe kërcënues. Por përtej deklaratave, figurat kryesore kanë nisur sërish të lëvizin dhe Trumpi, i zhytur në krizën e Lindjes së Mesme, rikthehet të ushtrojë presion: “E dini çfarë do të doja të bënin? Të gjenin një marrëveshje. Dua që Zelensky të arrijë një marrëveshje me Putinin dhe dua që Putini të arrijë një marrëveshje me të”, në “një të ardhme jo të largët: ndoshta do të arrijnë një marrëveshje përpara dimrit të plotë”.
Por optimizmi i presidentit harron një protagonist: Evropën. Në një vit e gjysmë përpjekjesh, planet e tij të papranueshme për Kievin, lidhur me mënyrën se si duhet përfunduar lufta duke i përjashtuar evropianët nga tryeza e negociatave, nuk kanë kaluar dhe pikërisht këtu Lavrovi e thellon sulmin: “Në Ukrainë po ndërmerren veprime të papërgjegjshme për të frenuar Rusinë. Shtetet e Bashkuara, referenca është për administratën e mëparshme, shkatërruan sistemin e sigurisë evropiane dhe krijuan në Kiev një regjim rusofob. Perëndimi vazhdon të furnizojë me armë regjimin ukrainas” për t’i “shkaktuar Rusisë një disfatë strategjike”, por “nxitësit e luftës” do të përfundojnë “në një qorrsokak strategjik”. Dhe premton: “Objektivat e operacionit tonë të posaçëm ushtarak do të arrihen dhe kërcënimet ndaj sigurisë sonë do të eliminohen”.
Në të njëjtën linjë me akuzat e zakonshme, të enjten ai i dorëzoi sekretarit të përgjithshëm Guterres një raport me titullin “Trashëgimtarët e Goebbelsit: falsifikimi i ngjarjeve të Buchas dhe inskenimet e përgjakshme të regjimit të Kievit”.
Por pak përpara këtij sulmi të ashpër, drejtuesit e diplomacive të Moskës dhe Berlinit ishin shtrënguar sërish duart, siç nuk kishte ndodhur që përpara pushtimit. Njëzet minuta në një sallë të vogël, me delegacionet përkatëse, por me dyer të mbyllura dhe pa asnjë deklaratë të përbashkët.
Zyrtarisht, takimi rezultoi pa ndonjë rezultat, ndërsa Moska u kujdes të theksonte se kishte qenë Gjermania ajo që e kishte propozuar. Wadephul i kërkoi të braktiste “rrugën e rrezikshme të përshkallëzimit”. “Asgjë e re. I thashë: mund të më kishe thënë thjesht “lexo fjalimin tim”“, u përgjigj Lavrovi.
Por fakti që Berlini i kërkoi Moskës një takim, në një fazë kur negociatat po rifillojnë të lëvizin me nismën amerikane, nuk është një detaj i parëndësishëm./La Repubblica
Më të lexuarat
24 oret e fundit
Javen e fundit
Blog Tema
Lini një Përgjigje