Greqia qendrore dhe jugore është përfshirë këtë të diel nga reshje të dendura shiu, stuhi dhe breshër, ndërsa Shërbimi Meteorologjik grek ka shpallur alarm portokalli për motin e keq.
Fenomenet më të forta janë regjistruar në ishullin Evia dhe në Sporade, ndërsa gjatë ditës reshje të dendura dhe stuhi priten edhe në Thesalinë lindore, Volos e Magnezi, në pjesën perëndimore të Kretës dhe në ishujt e Cyclades. Në Evia, kushtet e këqija atmosferike pritet të vijojnë deri pasditen e së dielës.
Situata shoqërohet edhe me erëra të fuqishme verilindore. Në pjesët qendrore dhe veriore të Detit Egje, ato pritet të arrijnë deri në 7–8 ballë sipas shkallës Beaufort. Reshje dhe stuhi parashikohen gjithashtu në Greqinë Qendrore dhe në Peloponezin lindor.
Edhe kryeqyteti Athinë është prekur nga vala e motit të keq. Reshjet priten kryesisht në zonat veriore dhe lindore të qytetit, ndërsa përmirësimi i kushteve atmosferike parashikohet gradualisht gjatë mbrëmjes. Temperaturat në Athinë do të lëvizin nga 18 deri në 22 gradë Celsius.