Shoqatat “Fusha e Pellagonisë” dhe “Fermerët Jugperëndim” kanë njoftuar se më 30 shtator do të zhvillojnë protestë në shenjë pakënaqësie për mospagesën e primeve të qumështit dhe detyrimeve të tjera në sektorin e bujqësisë. Tubimi do të nisë në orën 11:00 në Topolçan, te mulliri “Osman”, përgjatë rrugës Manastir–Prilep.
Të lidhura
None found
Sipas blegtorëve, pagesat për qumështin e dorëzuar nuk janë kryer që nga korriku i vitit 2025. Ata kërkojnë gjithashtu që fondet për vitin 2026 të shpërndahen në kohë.
Një tjetër shqetësim i ngritur prej tyre lidhet me uljen e çmimit të blerjes së qumështit. Ata deklarojnë se çmimi, nga rreth 33 denarë për litër vitin e kaluar, ka zbritur në 23 denarë.
Borçe Buçinski nga shoqata “Fusha e Pellagonisë” tha se blegtorët ende nuk i kanë marrë pagesat për dhjetë muaj. Ai kërkoi që përfaqësuesit e tyre të marrin pjesë në hartimin e Programit për vitin 2027, ndërsa subvencioni për lopë të rritet në 250 euro.
Përfaqësuesit e “Fermerëve Jugperëndim” bëjnë të ditur se janë përpjekur t’i adresojnë këto probleme përmes komunikimit me Ministrinë e Bujqësisë. Megjithatë, sipas tyre, nuk kanë mundur të zhvillojnë një takim me institucionet përgjegjëse.
Të dhënat e publikuara tregojnë se detyrimet e shtetit ndaj blegtorëve arrijnë në rreth 600 milionë denarë për primet e papaguara të qumështit të vitit 2025 dhe në rreth 500 milionë denarë për muajt e parë të vitit 2026. Në mars të këtij viti janë ekzekutuar 270 milionë denarë për 4.545 prodhues, për periudhën janar–qershor 2025.
Ministria e Bujqësisë, ndërkohë, ka deklaruar se deri tani është realizuar rreth 90 për qind e mbështetjes financiare të planifikuar për bujqësinë gjatë vitit 2025, me pagesa në vlerën e rreth 6.5 miliardë denarëve.
Pavarësisht këtij njoftimi, blegtorët këmbëngulin se ndaj tyre ende nuk janë shlyer detyrime të mëdha financiare.
