Kryeministri Edi Rama ka reaguar ndaj akuzave të opozitës se ka marrë një orë me vlerë të lartë si dhuratë nga krimi i organizuar, duke i cilësuar kundërshtarët e tij si “pisanjosë me kostum parlamentar”.
Rama tha se të gjitha dhuratat që ka marrë gjatë kohës që ka ushtruar detyrën e kryeministrit janë regjistruar si pronë e shtetit shqiptar. Ai iu referua edhe një muzeu në Kryeministri, ku sipas tij ruhen dhuratat e marra gjatë kësaj periudhe.
“Kush ka përfituar të drejta kushtetuese të zhvillimit të pronës apo mundësi të ligjshme investimi, e di shumë mirë çfarë flas, e di shumë mirë çfarë them kur them se pushteti im nuk është përdorur për të dhënë favore të errëta. Sot në Kryeministri ka një muze të dhuratave. Atyre pisanjosëve me kostum parlamentar, të cilët kanë nxjerrë edhe një orë super të shtrenjtë që paskam marrë dhuratë nga krimi i organizuar, u them se në atë muze ka një duzinë orësh të shtrenjta dhe super të shtrenjta, të cilat më janë dhuruar mua nga miq të fuqishëm apo vizitorë të huaj. Ndryshe nga paraardhësi im, që i ka përlarë të tëra bashkë, unë i kam regjistruar të gjitha dhuratat për Kryeministrin si prona të shtetit shqiptar. Sepse çfarë vjen për mua si Kryeministër dhe çfarë më takon ta kem si Kryeministër, nuk vjen për ta çuar në shtëpinë time.”
Rama e përdori këtë deklaratë për të mohuar se pushteti i tij është përdorur për favore të paligjshme dhe për të theksuar se dhuratat e marra në cilësinë e kryeministrit nuk janë pronë personale.