Pogradeci shkruan historinë në volejbollin për femra, fiton Kupën ndaj Skënderbeut

Për herë të parë në historinë e volejbollit shqiptar për femra, dy skuadra nga juglindja e vendit u përballën në finalen e Kupës së Federatës Shqiptare të Volejbollit.

Skënderbeu dhe Pogradeci, skuadrat e dy qyteteve të juglindjes, u përballën me njëra-tjetrën në palestrën e Farkës në Tiranë, në një finale që shënoi një moment të veçantë për volejbollin e kësaj treve, e cila për herë të parë solli dy përfaqësuese në një finale të këtij niveli.

Në fund, ishte Pogradeci që ngriti trofeun e Kupës së Federatës, pas një finaleje të fortë ndaj Skënderbeut, të cilën e fitoi me rezultatin 3–1.

Pogradeci siguroi finalen pas një paraqitjeje bindëse në gjysmëfinale, ku mposhti Tiranën me rezultatin 3–0.

Me këtë sukses, skuadra e Besnik Lishës shton një tjetër trofe në koleksion dhe konfirmon ambiciet për këtë sezon. Pogradeci e nisi sezonin me objektivin për të luftuar për pesë trofe, pas tre trofeve të fituar sezonin e kaluar.

Një nisje e suksesshme për ekipin pogradecar, që tashmë vijon rrugëtimin në kërkim të trofeve të tjerë.