Andy Carroll është rikthyer në fushën e futbollit vetëm pak ditë pasi bëri publik rrëfimin e tij për një sulm seksual që, sipas autobiografisë së tij, e përjetoi në vitin 2021.
Ish-sulmuesi i Newcastle United, Liverpool dhe kombëtares së Anglisë u shfaq në ndeshjen e Dagenham & Redbridge kundër Hampton & Richmond Borough, duke u rikthyer në aktivitetin sportiv pas publikimit të historisë së tij personale.
Carroll, 37 vjeç, e ka rrëfyer ngjarjen në autobiografinë e tij të re, “Owning It”. Ai tregoi se sulmi ndodhi në shtëpinë e tij, gjatë periudhës kur ishte pjesë e Newcastle United.
Sipas rrëfimit të futbollistit, autori ishte një mik i ish-partneres së tij, i cili kishte qëndruar në shtëpinë e Carroll pas një mbrëmjeje ku kishin parë së bashku një ndeshje boksi. Carroll tregoi se ishte në gjumë kur kuptoi se po sulmohej seksualisht.
Pas ngjarjes, ai e nxori burrin nga banesa dhe, kur ai tentoi të rikthehej, e goditi duke e lënë pa ndjenja. Më pas njoftoi policinë.
Personi përgjegjës u shpall fajtor për vepra seksuale dhe u dënua me tre vite burg. Carroll dëshmoi edhe gjatë procesit gjyqësor, të cilin e përshkroi si një përvojë jashtëzakonisht të vështirë.
Në autobiografi, ai shkroi:
U sulmova seksualisht, ja ku e thashë. Është e frikshme edhe ta mendosh dhe vetëm pak njerëz e dinin për këtë deri tani.
Carroll shpjegoi gjithashtu se vendimi për ta bërë publike historinë nuk ishte i lehtë. Ai tha se diskutoi gjatë me partneren e tij, Lou Teasdale, përpara se të vendoste ta përfshinte rrëfimin në libër.
Është e frikshme të flasësh për këtë, por më ka bërë njeriun që jam sot, po aq sa edhe gjërat e mira. Dhe nëse të folurit për këtë më ndihmon të paktën një person, atëherë ia ka vlejtur
– shkroi ai.
Futbollisti pranoi se ngjarja kishte ndikuar në shumë aspekte të jetës së tij, përfshirë edhe karrierën sportive.
Ajo që më ndodhi ndikoi në çdo aspekt të jetës sime. Mendoja për të çdo ditë, duke e bërë të vështirë të përqendrohesha në çdo gjë tjetër, përfshirë futbollin. Trauma e asaj që më ndodhi nuk është zhdukur
-tha Carroll.
Aktualisht, Carroll është lojtar dhe bashkëpronar i Dagenham & Redbridge, klub që garon në National League South. Rikthimi i tij në fushë erdhi pak ditë pasi ai vendosi të fliste publikisht për një përvojë që për vite me radhë e kishte mbajtur private.
