Presidenti i Shteteve të Bashkuara, Donald Trump, i ka sugjeruar presidentit kinez Xi Jinping që Pekini të blejë pajisje ushtarake amerikane, në mënyrë që të lehtësohen shqetësimet e Kinës lidhur me armatimin që Uashingtoni i shet Tajvanit.
Të lidhura
None found
Detajet u bënë publike nga ambasadori amerikan në Pekin, David Perdue, në një intervistë për Fox News. Perdue konfirmoi se propozimi i është bërë Xi Jinpingut nga Trump, por nuk dha informacion për kohën kur është zhvilluar kjo bisedë.
Ambasadori deklaroi se çështja e shitjeve amerikane të armëve për Tajvanin është ngritur në mënyrë të përsëritur gjatë kontakteve mes dy presidentëve. Megjithatë, ai theksoi se politika e Uashingtonit në këtë drejtim mbetet e pandryshuar.
SHBA-ja miratoi në dhjetor një paketë armatimi për Tajvanin me vlerë rreth 11.1 miliardë dollarë. Kina e kundërshton ashpër furnizimin ushtarak të ishullit, të cilin e konsideron pjesë të territorit të saj.
Pekini ka shprehur synimin për bashkimin me Tajvanin dhe nuk ka përjashtuar mundësinë e përdorimit të forcës. Ndërkohë, Shtetet e Bashkuara vijojnë të forcojnë kapacitetet mbrojtëse të ishullit përmes shitjeve të armëve.
