Zbuloi transferimin sekret të dy ushtarëve koreano-veriorë, Koreja e Jugut i kërkon llogari Ukrainës: Kërkoni falje!

Koreja e Jugut i ka kërkuar Ukrainës shpjegim zyrtar dhe falje pasi Kievi bëri publik transferimin e dy ushtarëve koreano-veriorë të kapur në luftën në Ukrainë.

Seuli pretendon se transferimi ishte diskutuar paraprakisht me autoritetet ukrainase dhe se të dyja palët kishin rënë dakord ta mbanin çështjen konfidenciale, për arsye sigurie dhe humanitare.

Zyra presidenciale e Koresë së Jugut tha se publikimi i informacionit nga Ukraina, pa konsultime të mjaftueshme, ka dëmtuar besimin mes dy vendeve. Seuli gjithashtu kundërshtoi deklaratat e Ukrainës se nuk kishte pasur një marrëveshje për moszbulimin e transferimit.

Presidenti ukrainas Volodymyr Zelensky njoftoi javën e kaluar në Asamblenë e Përgjithshme të OKB-së se dy ushtarët ishin transferuar në Korenë e Jugut. Ata ishin kapur nga forcat ukrainase në rajonin Kursk të Rusisë në janar 2025, ndërsa luftonin në krah të trupave ruse.

Sipas autoriteteve koreano-jugore, dy ushtarët kishin shprehur dëshirën për të shkuar në Korenë e Jugut. Seuli më herët kishte shmangur konfirmimin publik të mbërritjes së tyre, duke përmendur shqetësime për sigurinë e tyre dhe të familjeve të tyre në Korenë e Veriut.

Ambasada e Ukrainës në Seul nuk ka komentuar menjëherë kërkesën e Reuters për reagim.