Kreu i inteligjencës egjiptiane telefonoi Netanyahun para 7 tetorit, si u injorua paralajmërimi për sulmin e Hamasit

Shefi i inteligjencës egjiptiane, Abbas Kamel, i telefonoi kryeministrit izraelit Benjamin Netanyahu në ditët para sulmit të Hamasit më 7 tetor 2023, duke përcjellë një paralajmërim të mëtejshëm për një sulm të mundshëm nga Rripi i Gazës. Sipas një raportimi të “Wall Street Journal”, të cilit i janë referuar gjerësisht edhe mediat izraelite, Egjipti kishte dhënë disa sinjale për përshkallëzimin e situatës, por paralajmërimet nuk u morën seriozisht nga zyrtarët izraelitë.

Telefonata e Kamelit në zyrën e Netanyahut erdhi në fillim të tetorit, ndërsa një burim i cituar në raport ka deklaruar se autoritetet egjiptiane vazhduan të paralajmëronin Izraelin deri rreth 48 orë para sulmit. Paralajmërimet, sipas raportit, lidhen me shenja se një sulm nga Hamasi mund të ishte i afërt.

Sipas “The Times of Israel”, Egjipti kishte paralajmëruar Izraelin që në qershor 2023 për situatën në Gaza. Në atë kohë, autoritetet egjiptiane i kishin bërë thirrje Izraelit të rifillonte negociatat me grupin palestinez për një marrëveshje të shkëmbimit të pengjeve. Në shtator, Kamel kishte udhëtuar drejt Izraelit dhe kishte përcjellë shqetësimin se situata në Gaza ishte kritike dhe rrezikonte të përshkallëzohej. Raporti, duke cituar zyrtarë anonimë nga një qeveri arabe, thotë se zyrtarët izraelitë i minimizuan këto shqetësime dhe e siguruan palën egjiptiane se situata ishte nën kontroll.

Pas këtyre zhvillimeve, Kamel telefonoi drejtpërdrejt zyrën e Netanyahut në ditët e para të tetorit. Sipas raportimit, Egjipti vijoi të përcillte paralajmërime deri pak para sulmit të 7 tetorit. Netanyahu më herët ka mohuar se kishte zhvilluar biseda me Kamelin gjatë muajve para sulmit. Çështja është bërë pjesë e një serie raportimesh dhe hetimesh mbi informacionet dhe sinjalet që autoritetet izraelite kishin marrë përpara ofensivës së Hamasit, por që nuk arritën të parandalonin sulmin.

Raporti përmend gjithashtu paralajmërime të tjera të marra nga Izraeli. Sipas tij, presidenti i Emirateve të Bashkuara Arabe, Mohamed bin Zayed Al Nahyan, kishte telefonuar Netanyahun në shtator 2023 për ta paralajmëruar mbi shenja të një sulmi të mundshëm nga Hamasi. Megjithatë, sipas raportit, asnjë prej paralajmërimeve nuk përmbante të dhëna specifike mbi datën, orën apo përmasat e sulmit të planifikuar. Kjo përputhet edhe me raportime të mëparshme mbi informacionet që autoritetet izraelite kishin marrë përpara 7 tetorit 2023.