Skandali i SHISH/ Mblidhet Këshilli i Sigurisë Kombëtare

Këshilli i Sigurisë Kombëtare është mbledhur këtë të hënë në orën 8:30 në Pallatin e Brigadave, me thirrjen e Presidentit Bajram Begaj.

Mbledhja e Këshillit të Sigurisë Kombëtare vjen pas publikimit të skandalit në Shërbimin Informativ Shtetëror, ndërsa ndaj ish-drejtueses Vlora Hyseni u lëshua masa e sigurisë “arrest në shtëpi” dhe pezullim nga detyra, pasi u zbuluan lidhjet e saj me emrin e njohur për drejtësinë, Ergys Agasi.

Në mbledhje mori pjesë kryeministri Edi Rama, kryetari i Kuvendit, Niko Peleshi, si dhe ministri i Mbrojtjes, Ermal Nufi, ai i Brendshëm, Ervin Demo, ministri i Financave, Petrit Malaj, ministri i Jashtëm, Ferit Hoxha, dhe ai i Energjisë dhe Infrastrukturës, Enea Karakaçi.

Nga Kuvendi, ishte i pranishëm edhe kryetari i Komisionit të Sigurisë dhe Mbrojtjes, Bledi Çuçi.

Sipas përcaktimeve ligjore, në mbledhje morën pjesë gjithashtu shefi i Shtabit të Përgjithshëm të Forcave të Armatosura, Arben Kingji, si edhe drejtori i Përgjithshëm i Policisë së Shtetit, Hita.

Rama kërkoi që Këshilli i Sigurisë Kombëtare të shqyrtojë se çfarë mekanizmash duhet të forcohen për të garantuar sigurinë e institucioneve dhe informacionit të klasifikuar edhe në rastet kur drejtuesit e tyre përballen me hetime penale./ CNA