Presidenti i Republikës, Bajram Begaj, mblodhi mëngjesin e sotëm Këshillin e Sigurisë Kombëtare, në një takim që nisi në orën 08:30 dhe përfundoi rreth një orë më vonë.
Mbledhja u zhvillua në një kohë kur ish-drejtoresha e SHISH, Vlora Hyseni, ndodhet nën masën e sigurisë “arrest në shtëpi”, pas hetimeve të SPAK. Pas masës së sigurisë, Hyseni u shkarkua nga drejtimi i Shërbimit Informativ të Shtetit.
Në tryezën e thirrur nga Presidenti morën pjesë kryeministri Edi Rama, kryetari i Kuvendit Niko Peleshi, ministra përgjegjës dhe drejtues të institucioneve të sigurisë.
Rama ka deklaruar se hetimi ndaj Vlora Hysenit i përket drejtësisë, ndërsa mbrojtja dhe garantimi i funksionimit të institucioneve të sigurisë është përgjegjësi e shtetit.
Kush janë anëtarët e Këshillit të Sigurisë Kombëtare
Këshilli i Sigurisë Kombëtare kryesohet nga Presidenti i Republikës. Sipas përbërjes së përcaktuar në materialin e publikuar nga Panorama, në të bëjnë pjesë:
– Kryetari i Kuvendit, Niko Peleshi
– Kryeministri Edi Rama
– Ministri i Mbrojtjes, Ermal Nufi
– Ministri përgjegjës për Punët e Jashtme, Ferit Hoxha
– Ministri i Drejtësisë, Toni Gogu
– Ministri përgjegjës për Punët e Brendshme, Ervin Demo
– Ministri përgjegjës për Financat, Petrit Malaj
– Ministri përgjegjës për Infrastrukturën dhe Energjinë, Enea Karakaçi
– Kryetari i komisionit të përhershëm parlamentar përgjegjës për sigurinë dhe mbrojtjen, Bledar Çuçi
– Shefi i Shtabit të Përgjithshëm të Forcave të Armatosura, Arben Kingji
– Drejtori i Shërbimit Informativ të Shtetit, Elvis Lila
– Drejtori i Përgjithshëm i Policisë së Shtetit, Skënder Hitaj.
Mbledhja e Këshillit të Sigurisë Kombëtare vjen në një moment të rëndësishëm për institucionet e sigurisë, pas zhvillimeve të fundit lidhur me hetimin ndaj ish-drejtores së SHISH.
