Formimi i qeverisë në Suedi mbetet i pasigurt, pavarësisht se në zgjedhjet e zhvilluara këtë muaj shumicën e vendeve parlamentare e mori blloku i qendrës së majtë.
Të lidhura
None found
Udhëheqësja e socialdemokratëve, Magdalena Andersson, deklaroi se në kushtet e krijuara nuk arrin të sigurojë numrat e nevojshëm për të drejtuar vendin.
Vendimi u bë i ditur pasi Partia e Majtë njoftoi gjatë fundjavës se do të votojë kandidatin e Partisë Moderatore rivale për postin e kryetarit të Parlamentit. Andersson vlerësoi se ky pozicion e ka dobësuar përpjekjen e saj për krijimin e një kabineti qeveritar.
Në zgjedhjet e 13 shtatorit, koalicioni i qendrës së majtë fitoi 176 mandate, duke pasur një avantazh prej vetëm tri vendesh ndaj bllokut të djathtë në pushtet, të udhëhequr nga kryeministri Ulf Kristersson. Për shkak të diferencës së ngushtë, votat e partive të këtij blloku janë vendimtare.
Andersson bëri të ditur se do ta njoftojë kryetarin e Parlamentit për pamundësinë e formimit të qeverisë. Pas kësaj, ai do të përcaktojë se cilit lider do t’i japë mandatin për të kërkuar mbështetje në Parlament. Ky proces mund t’i besohet edhe Kristerssonit, ndonëse koalicioni i tij u rendit i dyti në zgjedhje.
