Deklarat e Khamenei: “Forcat armiqësore” do të dëbohen nga Deti Arabik

Forcat iraniane i kanë shtyrë “forcat armiqësore” nga ujërat pranë bregdetit jugor të Iranit në Detin Arabik dhe së shpejti do t’i dëbojnë ato edhe që andej, tha të hënën udhëheqësi suprem i Iranit, Mojtaba Khamenei , sipas një postimi në kanalin e tij Telegram.

Mesazhi i ri nga udhëheqësi suprem i Iranit vjen ndërsa ndërmjetësuesit po i bëjnë presion Teheranit që të bëjë kompromis mbi programin e tij bërthamor në mënyrë që të hapë rrugën për rifillimin e bisedimeve me Shtetet e Bashkuara, sipas burimeve të cituara nga Wall Street Journal.

Presidenti i SHBA-së, Donald Trump, e hodhi poshtë propozimin e Teheranit për të hapur Ngushticën e Hormuzit.

Megjithatë, udhëheqja iraniane beson se mund t’i rezistojë presionit të SHBA-së , bllokadës apo edhe një përsëritjeje të mundshme të sulmeve ajrore, sipas zyrtarëve të qeverisë rajonale që janë në kontakt të rregullt me ​​Iranin dhe që folën me gazetën amerikane.

SHBA-të dhe Izraeli nisën sulme në shkurt, me qëllim degradimin e aftësive ushtarake të regjimit iranian dhe kufizimin e kërcënimeve që rrjedhin nga programet e tij bërthamore dhe raketore.

Tani, hapja e Ngushticës së Hormuzit , të cilën Irani është përpjekur ta bllokojë që nga fillimi i luftës, duket se është bërë fokusi i përpjekjeve diplomatike për t’i dhënë fund konfliktit.