Presidenti amerikan Donald Trump e pyeti homologun kinez Xi Jinping nëse Pekini ishte i interesuar të blinte armë nga SHBA-ja. Për këtë bisedë, që sipas ambasadorit amerikan në Pekin, David Perdue, u zhvillua mes dy liderëve javën e kaluar në Uashington, foli vetë ambasadori.
Të lidhura
None found
Pas komenteve të Perdue, Departamenti amerikan i Shtetit bëri të ditur se ligji nuk lejon shitjen e armëve Kinës, ndaj nuk ekziston as ofertë dhe as plan për një marrëveshje të tillë. Edhe Shtëpia e Bardhë konfirmoi se nuk po shqyrton shitjen e armëve për Pekinin.
Çështja merr rëndësi të veçantë për Tajvanin, i cili prej muajsh pret që Trump të miratojë një paketë armësh amerikane me vlerë 14 miliardë dollarë. Në maj, presidenti tha se kishte shtyrë vendimin, duke e përshkruar paketën si një instrument të mundshëm në negociatat me Kinën.
Pekini kundërshton furnizimin e Tajvanit me armë amerikane, pasi e konsideron ishullin pjesë të territorit të vet. Një zyrtar i lartë tajvanez tha se Kina përbën një kërcënim të rëndë ushtarak për ishullin dhe se Uashingtoni i kupton nevojat e tij të mbrojtjes.
