Ardit Kutleshi, shtetas i Kosovës, 28 vjeç, pranoi fajësinë për krijimin dhe administrimin e “Rydox”, një platformë interneti dhe treg ilegal që u mundësonte kriminelëve kibernetikë të blinin, shisnin apo shkëmbenin të dhëna personale të vjedhura. Në këtë faqe ofroheshin gjithashtu pajisje dhe mjete që mund të përdoreshin për krime kibernetike dhe mashtrime. Për këto veprime, ai do të përballet me një dënim me burgim në Shtetet e Bashkuara.
Të lidhura
None found
Ambasada e SHBA-së në Kosovë e prezantoi rastin si një dëshmi të bashkëpunimit të suksesshëm mes dy vendeve në luftën kundër krimit kibernetik ndërkufitar. Në reagimin e saj, ajo falënderoi zyrën e kryeprokurorit të Prokurorisë Speciale të Kosovës, Blerim Isufajn, si dhe institucionet e tjera në Prishtinë.
“Ky është një tjetër shembull i bashkëpunimit të suksesshëm SHBA-Kosovë në luftën kundër krimit kibernetik transnacional. Falënderojmë Zyrën e Prokurorit Special të Kosovës, institucionet e Kosovës dhe të gjithë personat e përfshirë për bashkëpunimin e shkëlqyer që bëri të mundur dërgimin e këtij rasti përpara drejtësisë”, thuhet në deklaratën e Ambasadës amerikane në Kosovë.
