Deputetja e Partisë Demokratike, Albana Vokshi, deklaroi se procesi i integrimit të Shqipërisë në Bashkimin Europian nuk duhet të shihet vetëm si një proces teknik i mbylljes së kapitujve, por duhet të shoqërohet me përmbushjen reale të standardeve europiane.
Gjatë fjalës së saj, në konfeencën ndërparlamentare të zhvilluar në Tiranë, Vokshi theksoi se anëtarësimi në BE duhet të jetë një proces i bazuar në meritë dhe se grupkapitulli “Themeloret”, që përfshin çështje si shteti i së drejtës, demokracia dhe funksionimi i institucioneve, ka një rëndësi të veçantë.
“Zgjerimi është instrumenti më i fuqishëm reformues i Europës, por vetëm kur kushtëzimi zbatohet me rigorozitet. Për këtë arsye, grupkapitulli ‘Themeloret’ hapet i pari dhe mbyllet i fundit”, u shpreh Vokshi.
Ajo argumentoi se mbyllja teknike e kapitujve nuk është e mjaftueshme nëse nuk ka përparim real në standardet demokratike.
“Pa zgjedhje të lira, prokurime të ndershme, gjyqësor të pavarur dhe institucione që i nënshtrohen ligjit, përparimi në kapitujt e tjerë mbetet vetëm në letër”, tha ajo.
Në vijim, Vokshi kërkoi që standardet përfundimtare të jenë të detyrueshme dhe të zbatueshme, ndërsa zgjedhjet e lira dhe të barabarta të trajtohen si një standard themelor i procesit të integrimit.
“Nëse shpërblejmë numrin e kapitujve dhe jo përmbajtjen e reformave, zgjerimi nuk do të eksportojë stabilitet”, u shpreh Vokshi.
Deputetja demokrate, po ashtu ngriti shqetësime për zgjedhjet, korrupsionin, krimin e organizuar dhe funksionimin e institucioneve, duke kërkuar që procesi europian të shoqërohet me standarde konkrete dhe të matshme.
“Nëse shpërblejmë numrin e kapitujve dhe jo përmbajtjen e reformave, zgjerimi nuk do të eksportojë stabilitet”, tha Vokshi ndër të tjera.
