Një nga arratisjet më spektakolare nga burgjet greke ndodhi më 22 shkurt 2009, kur Alket Rizai dhe Vassilis Paleokostas u arratisën për herë të dytë nga burgu i sigurisë së lartë Korydallos, në Athinë.
Gjithçka ishte organizuar në detaje. Ndërsa dy të burgosurit ndodheshin në ambientet e burgut, një helikopter u shfaq mbi Korydallos. Në bord ndodhej një grua e identifikuar si “zonjusha Alexandrova”, e cila dyshohet se ishte partnerja e Rizait, Aspasia Mitropia, e njohur në media si “Sula e Rizait”.
Sipas dëshmive të publikuara pas ngjarjes, gruaja kishte marrë me qira helikopterin dhe gjatë fluturimit nxori një granatë dore, duke kërcënuar pilotin dhe e detyruar atë të drejtohej drejt burgut.
Në tokë, alarmi në Korydallos u aktivizua sapo rojet vunë re helikopterin. Ndërkohë, nga mjeti fluturues u lëshua një shkallë me litar drejt çatisë së burgut, duke u krijuar mundësinë Rizait dhe Paleokostas të largoheshin.
Një prej rojeve tentoi t’i ndalonte, por Rizai e kërcënoi me një hell qebapësh. Pak çaste më vonë, të dy arritën të hipnin në helikopter.
Arratisja u kthye në kaos kur rojet hapën zjarr. Tre prej tyre përdorën automatikë MP5 dhe qëlluan mbi helikopterin, duke e goditur me më shumë se 30 plumba. Një prej plumbave preku depozitën e karburantit dhe në kabinë nisi të përhapej karburanti.
Piloti u detyrua të kryente një ulje emergjente. Megjithëse helikopteri u qëllua disa herë, Rizai, Paleokostas, gruaja dhe piloti nuk pësuan lëndime të rënda.
Pamjet e arratisjes, të regjistruara nga një banore e një apartamenti pranë burgut, u publikuan më pas dhe u përhapën gjerësisht në internet.
Arratisja e dytë e dy të burgosurve u shndërrua në një prej ngjarjeve më të bujshme kriminale në Greqi. Emrat e Rizait, Paleokostas dhe Mitropias u bënë pjesë e një serie historish që qarkulluan për muaj të tërë në mediat greke dhe ndërkombëtare.
Por liria e Rizait nuk zgjati shumë. Më 17 nëntor 2009, ai u arrestua sërish në Grammatiko, së bashku me partneren e tij, Aspasia Mitropia, e cila në shtyp njihej si “Sula e Rizait”.
