Nënkryetarja e Kuvendit nga Pogradeci: Siguria në shkolla, shqetësim kryesor i prindërve dhe mësuesve

Siguria e nxënësve në shkolla ka qenë në fokus të vizitës së Komisionit Parlamentar për Nismat Qytetare, Bashkëpunimin dhe Mbikëqyrjen Institucionale në Pogradec.

Anëtarë të komisionit kanë zhvilluar takime me drejtues dhe punonjës të institucioneve të ndryshme, ndërsa një prej grupeve të punës është ndalur në gjimnazin e Pogradecit. Në qendër të diskutimeve kanë qenë masat për garantimin e sigurisë së fëmijëve, bashkëpunimi mes shkollës dhe institucioneve ligjzbatuese, por edhe problematikat e reja që lidhen me përdorimin e rrjeteve sociale dhe sigurinë në hapësirën online.

Përfaqësuesit e komisionit kanë dëgjuar nga afër shqetësimet e drejtuesve, mësuesve, oficerëve të sigurisë, punonjësve të shërbimit psiko-social, mësuesve ndihmës dhe nxënësve.

Në fjalën e saj, një prej anëtareve të këtij komisioni dhe njëherazi nënkryetarja e Kuvendit, Evis Kushi tha se në gjimnazin e Pogradecit situata paraqitet pozitive dhe puna e stafit është vlerësuar si e përkushtuar, por kjo nuk do të thotë se problematikat janë shteruar.

“Të jeni të sigurt që të gjitha vendimet që janë marrë, përfshirë këtu dhe kamerat, janë në funksion të sigurisë së nxënësve. Ky është qëllimi primar dhe është një vendimmarrje që është pritur jashtëzakonisht mirë nga prindërit në radhë të parë, por padyshim edhe nga stafi i shkollës. Do të respektohen të gjitha rregullat siç i kanë me protokolle edhe vendet e tjera, siç janë standardet më të mira edhe në vendet e Bashkimit Evropian”,-theksoi Kushi.

Një tjetër nismë e diskutuar gjatë takimit ka qenë programi “After School”. Kushi tha se kjo nismë ka qenë një kërkesë e vazhdueshme e prindërve, të cilët kërkojnë që fëmijët të kenë mundësi të qëndrojnë në një mjedis të sigurt edhe pas orarit të mësimit, duke e shfrytëzuar këtë kohë për aktivitete që zhvillojnë aftësitë dhe interesat e tyre.

Mësuesit dhe prindërit kanë ngritur shqetësimin për rreziqet që mund t’u vijnë fëmijëve nga hapësira online, ndërsa sipas Kushit, kjo është një problematikë që shpesh është më e vështirë për t’u identifikuar nga shkolla, pasi konfliktet apo problematikat mund të zhvillohen jashtë ambienteve dhe orarit shkollor.

“Shqetësim i jashtëzakonshëm i mësuesve, po edhe i prindërve, është rreziku apo rreziqet që u vijnë nxënësve, veçanërisht nga rrjetet sociale apo në përgjithësi nga rrjetet online. Shkolla ka për qëllim edhe t’i parandalojë shumë problematika, shumë incidente, po ka disa problematika që është shumë e vështirë t’i identifikosh. Një pjesë ne i shohim, ato që janë probleme edhe konflikte fizike mes nxënësve, po janë disa që shkolla e ka të pamundur, pra është pikërisht kjo pjesa që qarkullon në rrjetet sociale. Kjo është sfida: se si të bëhemi bashkë dhe t’i parandalojmë këto rreziqe që vijnë nga këto burime që janë shumë të vështira që t’i identifikosh dhe t’i parandalosh në kohë”,-tha Kushi.

Krahas sigurisë në shkolla, përfaqësuesit e komisionit kanë zhvilluar takime edhe në institucione të tjera të Pogradecit.

Shqetësimet dhe propozimet e mbledhura gjatë takimeve do të adresohen në vijim përmes punës së komisionit, ndërsa siguria e nxënësve, bashkëpunimi ndërinstitucional dhe mbrojtja e fëmijëve edhe nga rreziqet online mbeten ndër çështjet e diskutuara gjatë vizitës./CNA