Raketa gjigante Starship e SpaceX ka arritur në orbitë për herë të parë, duke shënuar një moment të rëndësishëm për kompaninë e Elon Musk, pavarësisht një problemi teknik gjatë fluturimit.
Një prej motorëve u fik papritur në mes të misionit, duke detyruar ekipin të shkurtonte kohëzgjatjen e fluturimit. Misioni ishte planifikuar të zgjaste rreth 10 orë, por përfundoi pas vetëm tre orësh.
E nisur nga kompleksi Starbase, pranë Brownsville në Teksas, Starship arriti të vendoste në orbitë grupin e parë të satelitëve të rinj Starlink.
Në përfundim të misionit, raketa kreu një zbritje të kontrolluar dhe përfundoi në Oqeanin Paqësor.
Ky ishte fluturimi i 14-të i Starship që nga viti 2023. SpaceX synon ta përdorë raketën në mënyrë rutinë duke nisur nga fundi i këtij viti.
Mjeti pa ekuipazh, rreth 40-katësh, përbëhet nga raketa përforcuese Super Heavy dhe anija kozmike Starship, e vendosur në pjesën e sipërme. Sistemi u ngrit nga platforma e lëshimit në kompleksin Starbase, përgjatë Gjirit të Meksikës.
Starship është projektuar nga SpaceX si një sistem plotësisht i ripërdorshëm, me synimin për të ulur ndjeshëm koston e fluturimeve hapësinore dhe për të mundësuar misione më të shpeshta.
Suksesi i programit është gjithashtu i rëndësishëm për vlerën e kompanisë. Aksionet e SpaceX, të cilat kishin shënuar rritje të ndjeshme në periudhën e fundit, ranë rreth 1% gjatë së hënës.
Pavarësisht problemit me motorin dhe shkurtimit të misionit, arritja e Starship në orbitë përbën një hap të rëndësishëm në përpjekjet e SpaceX për ta kthyer sistemin në një mjet të përdorimit të rregullt.
